Abtik sa tsiks - Gula 4

Alegre kaayo ang magbarkada sa ilang duwa nga dakup-dakop samtang naligo sa dagat kay dali ra kaayo nga madakpan ang mga kauban ni Clifford. Dihang kang Clifford na nga turno nga maoy mudakop, si Fatima maoy iyang tumong nga dakpon.

Maayo nga musawom sa dagat si Fatima ug nahagit si Clifford nga dili magpalupig. Mauwaw siya kun malupig ni Fatima nga dili makadakop. Nagpahiyom si Fatima nga nagtan-aw kang Clifford nga iyang nasabtan nga siya maoy tumong nga dakpon.

Mitidlum sa tubig si Clifford apan abtik usab kaayo nga misawom si Fatima. Nakasabot si Fatima nga nagpaingon sa iyang nahimutangan si Clifford mao nga misawom siya paingon sa wala nga direksyon.

Tuod, pagtunga ni Clifford sa dapit nga gitindogan ni Fatima kaganina wala na didto ang dalaga. Wala niya kini makita   mao nga nahalingi-lingi si Clifford nga nag-aninaw sa dagat. Taud-taud miguho na ang ulo ni Fatima didto sa unahan mao nga abtik usab kaayo si Clifford nga mitidlum pagbalik sa tubig.

Nalingaw kaayo ang mga barkada nga nagtan-aw nila ni Clifford ug Fatima nga nagsukdanay kinsa kanila ang abtik nga musawom. Gianinaw ni Fatima ang palibot ug kay wala man niya makita si Clifford mibalik kini pagsawom.

Naanad na si Clifford nga musawom sa dagat nga dili magsul-ob og antipara mao nga magbuka ang iyang mga mata bisan tua siya sa ilawom sa tubig. Nalantawan ni Clifford si Fatima nga nagsawom.

Mitunga kadiyot si Clifford aron sa paghanggap og hangin ug abtik nga mibalik pagsawom paingon sa direksyon nga girombo ni Fatima. Mitunga si Fatima sa unahan nga gipagakpakan sa iyang mga bag-ong barkada.

“Asa si Clifford?” gipangutana ni Fatima ang iyang mga bag-ong barkada bisan og nag-abot ang iyang gininhawa. Mibalik na usab si Fatima sa pagsawom apan kalit lang nga adunay migakus kaniya ilawom sa tubig.  

Milimbag si Fatima ug nagdungan sila si Clifford nga mitunga sa tubig. Nagkinataw-anay ang duha samtang gipagakpakan sila dili lang sa ilang mga barkada kun dili apil na sa uban nga nalingaw pagtan-aw kanila.

“Bilib ko nimo Fat, maayo ka nga musawom... naglisod ko’g dakup nimo,” matud ni Clifford. Mingisi si Fatima nga nag-abot ang ginhawa sa kakutas. “Ikaw g’yud, bilib ko nimo kay nadakpan g’yud ko nimo.”

Nahuna-huna ni Clifford ang kalumoy sa hawak ni Fatima nga iyang nagakus didto ilawom sa dagat. Nakabantay siya nga wala ikasuko ni Fatima ang iyang gihimo nga paggakus kaniya didto ilawom sa tubig.

Kadto maoy nakapasuod pag-ayo nila’ng duha. - Sumpayan