Helmet law undangon, himuong reminder na lang

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Luyo sa hugot nga pag-implementar sa helmet law, hugot sab kining gisupak sa daghang badlungon. Kana lang mga drayber sa habalhabal haskang gahia’g ulo. Sagad nila mobiyahe nga wala’y helmet. Samot na ilang mga pasahero. Ang rason usa ra: Maglisod man gani silang drayber pagpalit og usa, unsa na kaha ang alang sa ilang pasahero?

Kahibulongan. Sa kadaghang nagmaneho’g habalhabal nga wala gyu’y sul-ob sul-ob og helmet, ambot nganong wala gyu’y nadakpan nila (kana lang magtapok diha sa Forest Hills, Banawa, oh! Badlungon pa ra ba gyud ang mga drayber. Mora’g way kahadlok mopadagan. Patuyang la’g pabulhot. Kulang sa pag-amping.) Tingali, kun may masikop, maihap lang sa tudlo. Ambot nganong dili man ang tanang nakalapas dakpon? Tan-awa ra gud nang nakaparadang motorsiklo nila, tsip, samtang nagpaabot og mga pasahero, sagad, wa gyu’y helmet. Di lang sa Forest hills. Sa tanan gyung naay habalhabal!

Kini nagpaila lang, nga lisod gyud diay i-implementar ang maong balaud. Dili gyud kini masunod sa kinabag-an. Samot na sa mga tawong labad og ulo, palahubog ug adik-adik. Mapunta na lang kini sa panaglalis, diin usahay musangko sa pagpinusilay ug musangpot sa wala damhang kamatayon.

Kadto lang nahitabo ni anhing Estremos, angay tong panaminan. Iyang helmet nga gibitay sa giparking niyang motorsiklo, nawala -- gikawat. Iyang gipangita. Hinungdan, nga naabot siya sa RR. Landon, P. del Rosario ug Junquera sa pamasin nga adto ni niya makit-i kay mao man kuno ning dapita ang sagad abotanan sa mamaligyaay og kinawat nga helmet. Apan subo kaayong palandungon sanglit nasugatan man hinuon niya ang hinanaling kamatayon human niya ma-engkuwentro ang mga badlungon, kinsa mga masinupakon sa balaud. Dakpon unta ni Estremos ang sakay sa motor kay way helmet. Apan imbes magpadakop, gipatay hinuon ang pulis sa kriminal gamit ang kaugalingong pusil ni Estremos.

Tungod sa pag-implementar, mikalas hinuon kini’g buotang kinabuhi. Pero, yuna...hinuktokan una nato unsa ba gyu’y tumong ning pagpasul-ob og helmet? Di ba pagtabang man kini sa mga motorista nga maproteksiyonan ang ilang ulo ingkaso’g madisgrasya sa dalan? Para sa ila kining kaayohan. Apan gisunod ba? Tingali, ubay-ubay ang misunod. Apan mas daghan gyud ang wala. Sumala, unsa na ba kadaghan ang nangabuak nga ulo sa dalan ug dihadiha mikirig-patay kay wala gyud magsul-ob og helmet sa ilang pagmaneho? Kamatuoran kini, nga bisa’g higpit kaayo ang atong kapolisan sa pagpatuman sa Helmet Law, mas hugtanon ang tawo nga misupak niini. Sa laktod, way kapuslanan ang pag-implementar niini. Nagdugang lang sa kasong krimen sama sa pagpangawat og helmet, o pagpatay. Nga sa ato pa, imbes ang mga gahi’g ulo ra ang mamatay kay wa magsul-ob og helmet, hasta mga pulis, madamay pa usahay. Mapun-an pa hinuon ang kinabuhing makalas.

Hain kahay maayo, kun hunongon na lang kining helmet law ug himuon na lang kabahin sa mga safety tips or reminders sa mga magdrayeb ug mag-angkas sa motor. Naa ra nila kun mopatalinghug ba sila. Ilaha na nang choice, tsip! Mahalon ba nila ang ilang kinabuhi, o dili?