Abtik sa tsiks - Gula 3

Nahimong bida si Fatima sa mga barkada ni Clifford. Tulo ra sila nga babaye sa grupo mao nga pinangga kaayo sila sa mga lalaki. “Friendly man diay kaayo kining imong mga barkada Cliff mao nga dili na lang ko mauwaw bisan karon pa ko nila makaila,” ni Fatima pa.

“Salamat nga nalingaw ka nga nakig-uban kanamo Fat. Swerte kaayo ko nga naamiga tika kay aduna ko’y partner kay kun wala ka pa, mahisama unta ko nila ni bai Loloy ug Nardo nga walay partner kay ang duha namo ka kauban duna may mga bitbit nga girlfriend,” matud ni Cliff.

Samtang nagsultihanay sila si Clifford ug Fatima, ang mga mata sa ilang mga barkada didto ra kanila’ng duha. Nakabantay sila si Fatima ug Clifford nga nangahilom ang ilang mga kauban samtang nagtan-aw kanila.

Mora’g gibati’g kauwaw si Fatima. “Ayaw sila’g tagda Fat, nabag-ohan lang sila nimo kay guwapa ka man gud,” matud ni Clifford. Mora’g mibuka ang atay ni Fatima nga giingnan siya ni Clifford nga guwapa siya.

Alang kang Fatima, dili gayud kaayo siya guwapa apan daghan na nga mga lalaki ang midayeg kaniya kay kuno kusog kaayo siya’g sex appeal. Gani kanunay nga makabantay si Fatima nga kun aduna siya’y lalaki nga ikasugat molingi gayud kini kaniya.

Aron pagwagtang sa kauwaw, mitugsaw sa tubig si Fatima. Nahabilin si Clifford nga nagbarog sa tubig nga taga dughan ang gilawmon. Nahibulong si Clifford kay wala na motunga si Fatima. Nahalingi-lingi si Clifford kun asa na ang dalaga.

Wala na gayud niya makita pa si Fatima. “Bai, nawala si Fatima! Mitugsaw man to siya sa tubig apan wala na motunga pagbalik. Nabalisa kaayo ang grupo kun hain na si Fatima. “Fat! Fatima!,” pwerteng nakasinggit ni Clifford.

“Tua ra ang imong amiga bai o sa kilid sa dakung bato sa unahan,” matud ni Loloy. Didto ra tuod si Fatima kilid sa bato nga nagngisi. Milangoy kini balik sa nahimutangan sa grupo nga pareho nga nagngisi human sila gihakup sa kabalaka.

“Gikuyawan kaayo mi Fat kun hain ka na. Maayo ka man diay nga mosawom,” matud ni Clifford nga nagngisi ngadto sa dalaga. Mipahiyom usab si Fatima. “Gikomedyahan ka lang nako Cliff kun imo ba ko nga pangitaon.”

“Ikaw Cliff makamao ka ba ‘sab nga mosawom? Maayo pa og magkalingaw ta’g dakup-dakup aron masadya ta,” ni Fatima pa nga misugyot ngadto ni Clifford ug sa iyang mga  barkada. Dali ra nga nagkasabot ang magbarkada nga magduwa sila’g dakup-dakup sigon sa gisugyot ni Fatima. - Sumpayan