3 times

Dear Tita Salie,

Have a nice day and I hope you are more blessed this year. I wish you happiness always and good health. By the way, just call me Ms. Pieces, dili pa minyo apan duna koy live-in partner ug dunay 3 ka buok anak.

My problem is about my life. Makalibog gyod kaayo kay usahay tarong ug hapsay ug malipayon ug usahay usab lisod kaayong espilingon.

Kini man gong akong partner user og drugas. Pirme mi mag-away tungod sa iyang bisyo. Igo ra man ko niyang linlangon, ilaron ug usahay iya pa ko nga dapatan. Tungod niini nagbulag gyod mi 3 times na pero ang ending balik lang gihapon mi  tungod ug alang sa among mga anak.

Apan karon akong naobserbahan nga mora og nausab na siya kay iya na man na-control ang iyang bisyo. Dako kaayo nakong kalipay nga ingon og nagbinuotan na siya. Ug matud niya nga dili nako niya ilaron ug dili nako niya dapatan.

Pero nagpabilin ang pangutana sa akong hunahuna tinuod ba kaha ang iyang estorya? Unsa may angay nakong buhaton, Tita? Palihog pasabta ko. Daghang salamat sa imong pagtagad.

* * *

Good day,

Ayaw kalimti ang pagpasalamat tungod sa imong nakita nga kausaban sa imong partner. Ug padayon sa imong pag-ampo ug pagpangayo sa labaw nga makagagahom nga unta padayon na ang pagbinuotan sa imong partner. Nga hatagan unta siya og kalig-on nga dili na daling magalgal ug madala sa mga tentasyon.

Kun nausab na ang imong bana, wad-a na usab sa imong hunahuna ang kasuko ug pagduda nga tingali kun mobalik ra siya sa iyang binuhatan sa una. Tungod kay kun padayon kang maghunahuna niana dili lang gihapon ka magmalipayon sa inyong pagpuyo. Ug ikaw pa hinuon ang hinungdan nga mobalik siya sa daan niyang binuhatan.

Planoha ang inyong bulohaton matag-adlaw sa inyong pamilya. Ipakita kanunay ang kadasig sa pamilya ug ipakita kanunay ngadto sa imong partner ang kaayohan nga iyang nadawat sa iyang pag-usab, aron padayon na kini ug dili na siya madani sa mga tentasyon labina ang iyang bisyo.

Paningkamoti nga duna kamoy activities o buhaton sa panimalay. Pananglitan kun  may trabaho siya sa adlaw, inig ka gabii magdungan mo og pangaon ug anaa ang pagkumostahay mahitungod sa nahitabo sa tibuok adlaw. Ug ayaw kalimti nga i-apil gyod ninyo sa estorya ang inyong mga anak. Tungod kay dako kini og epekto ngadto kaniya. -- Tita Salie