Pagbasol

“Disyembre 25. Na-admit sa ospital si Noel kay giatake sa hayblad sa niaging gabii. Puwerte man gong kaon sa mga laming putahe sa Christmas Party nilang mga empleyado sa DPS. Giduaw siya karong hapona sa upat ka mga kauban niya sa trabaho. Nia si Rel, truck boy; Allan, assistant truck boy; Efren, mechanic ug Jerome, assistant mechanic. Si Noel drayber sa garbage dump truck.

“Kumusta na man ka?” ni Rel nga nibira og plastic nga lingkuranan. Nilingkod dikit sa walang kilid sa katre nga gihigdaan ni Noel. Nibarog lang ang tulo ka kauban luyo ni Rel. “OK na ko. Makagawas na kono ko   ugma. Pero pangitaon pa lagi ang ibayad sa ospital” ni Noel. Subo ang nawong. “PiIa man diay bayranan?’ ni Rel. “Nahurot akong diyes mil sa mga tambal ug laboratory. Posible laing diyes mil para sa doctor ug sa lawak” ni Noel. Nanghupaw.

“Nia o. Nagtampotampo mi ni Allan, Efren ug Jerome. Gikuhaan namo among bonus ug thirteenth month pay para makatabang nimo. Minus-minusi na god nang imong kaon ug inom” ni Rel nga nagtunol og sobre ngadtong Noel.

“Unsa man ni?” ni Noel pagdawat niya.

“Tan-awa lang” ni Rel.

Nanagpahiyom silang upat. Gipikat ni Noel ang sobre. Gilili ang sulod. Otso mil pesos ang sulod. Napatiurok ug nakapanglab-ok og laway si Noel.

“Salamat ninyo. Ug pasayloa ko ninyo. Gibalosan ninyo’g kaayo akong ngil-ad nga tratamento ninyo!” ni Noel dayong hilak. Nidangoyngoy.

“Way kaso oy. Nirespeto mi nimo. Nakasabot ra mi.Natural lang nang maningka ka kun sapoton. Abnormal ang tawong way sapot” dasi’g ni Rel sa higala.

“Nitabang lang mi nimo kay ikaw may tabangonon ron” timang ni Allan. Ug nihilak si Noel pag-ayo. Nakonsinsiya siya ug na-guilty pag-ayo sa iyang gibuhat. Nahinumduman niya iyang dakong sala niadtong unang semana sa Disyembre.

“Maayong buntag Doc?” timbaya ni Noel sa tawong naglingkod sa sementong lingkuranan kilid sa basketbolan sa baryo Guahibo.

Tigsayo man si Noel sa grahean sa dump truck. Siya pay nag-una.

Maayong buntag sab. Aw Merry Christmas diay. Hapit namang Pasko!” tubag ni Dr. Alex Tudtud.

Naghubo siya’s T-shirt nga berde nga natumog sa singot. Gitrapo niya sa tibook lawas ang basa nga T-shirt. Gikuha niya ang ugang T-shirt nga asul diha sa siyang tupad. Gisul-ob niya. Gihayhay niya ang basang T-shirt sa sementong bangko. Gipunit niya ang bola sa iyang tiilan ug nipadayon og basketbol nga mao rang usa. Nisayo lang si Noel. Nipadulong sa grahean sa garbage dump truck nga sikbit sa basketbolan sa habig sa silangan.

Samtang nagpaandar si Noel sa dump truck aron pag-warm up niapas ang doctor niya.

“Niay akong gamay’ng pinaskohan para nimo ug sa imong mga kauban” sa doctor.

Gidawat ni Noel ang gitunol nga lima ka sobre. May mga tatak “Merry Christmas!”

“Pareha ra nag sulod tanan. Pili  lang kag usa ug ang upat para nilang Rel, Allan, Efren ug Jerome” sa doctor.

“Salamat kaayo doc” ni Noel. Ug nibiya ang doctor.

Human na siya’g pasingot. Giablihan ni Noel ang usa ka sobre. May sulod usa ka libo ka pesos tibook. Giablihan niya ang tanang sobre. Gibulsa niya tanang sulod.

Hilom si Noel nga nagbasol sa iyang gibuhat. Nakonsensiya siya. Bisan sa iyang kahakog, ngadto sa iyang mga kauban, sila dili diay hakog. Motabang gihapon niya.

Nihilak siya sa dakong pagbasol sa iyang gibuhat. Nakasaad siya’s Ginoo ug sa iyang kaugalingon nga balusan niya ang kaayo sa iyang mga kauban. Ug di na siya manghilabot sa dili para iya. Di nalang siya mokumpisal sa iyang sala, apan hulipan niya iyang naildom ngadto sa iyang mga kauban, sa laing paagi. Kun duna unya sila’y mga panginahanglan makaya niya, motabang siya. (Kataposan)