Ikarga sa SSS

Dear Tita Salie,

Maayong adlaw kanimo, Tita ug kumosta? Akong mga panghinaot nga malipayon unta ka kanunay. Hinaot nga panalanginan unta sa Diyos ang imong mga buhat aron kini molambo.

Tawga lang ko’g Riza, dili pa minyo apan dunay kapuyo. Kining akong kapuyo, Tita Salie, minyo siya apan dugay na nga buwag sa iyang asawa, 8 years na ang nakalabay. Ang iyang asawa karon duna na say laing pamilya ug may anak na sa laing lalaki pero kasal sila.

Karon nagplano na usab kami nga magminyo na kay taudtaod na man sab ang among relasyon. Ug maoy among gusto nga makasal gyud mi, Tita. Puyde ba kaming makasal kay duna na may pamilya ang iyang asawa?

Kining akong karelasyon dunay trabaho ug member siya sa SSS. Kun duna na unya kami anak puyde bang ikarga sa akong partner ang akong anak sa iyang SSS? Ug ako usab, Tita Salie, puyde ba ko nga iyang i-apil sa iyang SSS bisan kun wala pa mi makasal?

Magpaabot gyud ko nga imong tambagan, Tita, ug hinaot nga imo kong sultian sa angayan nakong buhaton. Daghang salamat sa imong pagtagad.

* * *

Maayong adlaw usab kanimo Riza,

Bisan pila na ka tuig nga bulag sa iyang asawa ang imong partner, as long nga buhi pa ang asawa o anaa pa kini, dili gyud puyde nga mopuli ka sa lugar sa iyang asawa. Kay magpabilin gyud nga minyo siya.

Busa kun maoy gusto ninyo nga maminyo mo makasal gyud lihoka una ninyo ang papeles nga gikinahanglan aron kamo makasal. Bisan pa man kun mosugot na ang asawa sa imong partner nga magminyo mo tungod kay duna na siya’y laing pamilya apan dili lang gihapon puyde nga kaslon mo.

Kinahanglan pa nga ipa-annul una ang ilang kaminyoon una ka mamahimong legal nga asawa sa imong partner. Seguro dili na kini lisod alang kanila ang pagpa-annul tungod kay mahimo na man sila nga magtinabangay aron madali ang annulment tungod kay sila mang duha ang nagkinahanglan niini.

Puyde ra usab nga iyang i-apil og karga ang inyong anak sa iyang SSS tungod kay karon puyde na man gani nga dad-on sa bata ang apilyedo sa iyang papa bisan kun ang ginikanan wala pa makasal. Apan dili ka pa puyde nga iyang ikarga sa iyang SSS kay dili ka pa man niya asawa. Samtang dili pa sila ma-annul, ang iyang unang asawa lang gihapon ang dunay katungod kaniya. -- Tita Salie