Gula 6
Nakasiguro si Roel nga wala usab magmahay si Lalaine nga miabot kining maong higayon sa sulagma nila nga panagkaila.
Nalipay usab kaayo si Roel nga nagkaila sila ug sa maanyag nga si Lalaine nga wala gayo’y kalainan og panagway sa kanhi niya girlfriend nga si Mariven.
Mipara og taksi si Roel ug mipauli sa iyang gipuy-an nga balay sa dalan Echavez. Pag-abot niya sa iyang gipuy-an, gikuha niya ang iyang selpon ug diha pa niya masayri nga nag-text diay kaniya si Lalaine.
“Lipay g’yud kaayo ko Roel nga gipalitan ko nimo’g bag-o nga touch screen nga selpon. Mao ni ang akong gigamit karon,†matud ni Lalaine. Wala pa gani maka-reply si Roel sa message ni Lalaine, nakadawat na usab siya’g laing text message gikan sa dalaga.
“Makapa in-love man ‘sab ka Roel uy. Maayo ka pa sa akong boyfriend kay siya nindot kaayo’g selpon pero wala kahuna-huna paghatag og gift nako nga selpon,†ni Lalaine pa.
Nalipay g’yud kaayo si Roel sa pagkabasa sa mao nga message gikan ni Lalaine. Karon mora’g nalantaw na niya nga misalir ang iyang ideya nga masuod niya ang dalaga ug posible pa nga maangkon niya ang iyang gugma.
Gi-reply ni Roel ang message ni Lalaine. “Sangko sa langit tingali ang akong bation Laine kun ma in-love ka nako,†matud ni Roel.
Nakahuna-huna si Roel nga dili na man tingali angay pa nga magtago-tago siya kang Lalaine nga may gusto siya sa dalaga.
“Dili na ko magtago-tago pa sa akong gibati nimo Laine, I love you and I promise nga lipayon ko ikaw kun imo ako nga saligan,†matud ni Roel sa iyang text message.
Gi-send ni Roel ang mao nga message ngadto kang Lalaine uban ang kakulba nga naghuwat kun unsay tubag sa dalaga kaniya. Ang gamay’ng kunsuylo kang Roel mao ang pag-ingon ni Lalaine sa iyang text message nga makapa in-love ang iyang pagtagad sa dalaga.
“Tukma g’yud kaayo ang imong pag-abut sa akong kinabuhi Roel nga wala na kami maayong relasyon ug sa akong boyfriend,†ni Lalaine.
Wala makaagwanta si Roel, iyang gitawgan si Lalaine. “Laine, I love you and I really love you.†Nakabantay si Roel nga nag-smile si Lalaine didto sa pikas linya. “Mao diay nga gisigihan ko nimo’g tan-aw samtang nag-inusara lang ko didto sa pikas lamesa ganina,†matud ni Lalaine.
“Sugton na ba ko nimo Laine?†daw nagpanikad si Roel nga magpakisayud sa dalaga kun gisugot na ba siya niini. “I love you too Roel,†matud ni Lalaine. Mora’g mibahakhak sa kalipay ang kasing-kasing ni Roel nga nakadungog. (Sumpayan)