Mokamang sa silingan

Dear Tita Salie,

Maayong adlaw ug komusta? Itago lang ko sa pangalan nga Mystery girl, dili pa minyo apan dunay gikarelasyon ug gikauban pagpuyo.

Taudtaod na usab kami niining akong partner, Tita. Upat na ka tuig ang among relasyon. Ang akong problema mahitungod gyud niining akong karelasyon.

Naglagot ko niining lalakiha kay bag-o lang nakong nasayran gikan sa among silingan nga mogawas diay sa among panimalay kining akong partner kun lawom na ang kagabhion ug nahinanok nako pag-ayo sa akong pagkatulog.

Maghinayhinay diay kini siya og ikyas ug mokamang paingon sa balay sa among silingan, ug adto na siya motiwas paghigda. Iya kining gibuhat tungod kay duna diay sila’y relasyon sa amo na usab nga silingang usa ka dalaga.

Naglagot gyud ko pag-ayo sa maong hitabo. Dugay na diay nila kining gibuhat apan bag-ohay pa lang nakong nahibaw-an ang ilang binuang. Nagmata lang diay ko og buntag, Tita, ug wala masayod nga ila na diay kong giluiban.

Wala ko masayod nganong iya kining nabuhat kanako nga unta ako mang gibuhat ang tanan aron malipay siya. Unsa may akong buhaton, Tita? Palihog pasabta ko. Thank  you very much and more power.

* * *

Maayong adlaw usab kanimo Mystery girl,

Nagpasalamat ko sa inyong pagsunod sa atong column. Dili kini ako kun dili ato kay kita ang naghimo niini. Inyong suliran ang akong hatagan og sulbad. Bati basahon ang akong tambag kun wala ang inyong problema. Ug dili puwede nga tambag lang ang anaa sa maong column, magkuyog gyud ta. Mao nga atoa ang maong column. Ug ato gyud kining padayonon.

Ang nakalisod ug nakapait sa imong sitwasyon kay dili ka pa puyde moreklamo sa balaud tungod kay puyopuyo ra man mo, wala ka pay papel nga magpamatuod imo gyud siyang bana ug nga ikaw lang ang dunay katungod kaniya.

I am very sure nga sukad karon nga imong nasayran nga molikay diay ang imong partner, mogawas na ang imong pagka-insecure ug kanunay ka nang magduda kaniya. Tingali nga maglisod ka na pagkatulog kay anaa na man sa imong hunahuna nga tingali kun iyang buhaton pag-usab.

Busa kinahanglan imong hunahunaon, kun andam ka pa nga mopasaylo kaniya ug mohatag og another chance, kalimti ang tanan nga iyang nabuhat ug balik sa bag-ong sinugdanan. Ayaw na balika ang nahuman na aron dunay kalinaw ang inyong pagpuyo. -- Tita Salie