CEBU, Philippines - Human sa usa ka tuig nga relasyon, hingpit na nga gisilyuhan nila ni Maricar Reyes ug Richard Poon ang ilang paghinigugmaay pinaagi sa seremonya sa kasal adtong Domingo.
Kahinumduman nga niadtong Abril lamang niining tuiga, giangkon ni Richard nga engage na sila ni Maricar apan nagdumili siya pagbutyag kanus-a ang petsa sa ilang kasal. May mga pangagpas nga sa Disyembre pa kini mahitabo.
Mismong ang talent management sa duruha, Star Magic kang Maricar ug Cornerstone kang Richard ang nag-post og mga hulagway sa kasal sa ilang mga Instagram accounts.
Sila si Jose Mari Chan, Nikki Gil, Thor ug ASAP Sessionistas ang performers atol sa wedding reception.
Kahinumduman usab nga namulong si Richard sa milabay nga bulan lamang nga kun sigurado na ang duruha ka mga binuhat sa ilang pagbati alang sa usa’g-usa, wala nay rason nganong dugayon pa ang kasal. Suma pa ni Richard kaniadto nga unang pagkakita pa lamang niya kang Maricar sa Betty La Fea kaniadto, na crush na siya niini. Labing giganahan niya kang Maricar mao nga bisan pa man sa dili basta basta nga kasinatian niini, pabilin kining nagbarug ug nagmalig-on.