Manggiulawon

Gula 6

Nalantawan na ni Jerson nga migawas na si Karlyn apan diha sa tupad niini si Manny. Abtik kaayo ang mga mata ni Karlyn nga bisan og didto ra si Jerson sa daplin nagbarug apan iya dayon kini nga nakit-an ug giduol.

“Duna ko’y kuyog Man,” giingnan ni Karlyn si Manny dungan sa paggunit sa dalaga sa bukton sa iyang boyfriend. Nakapangutkot sa iyang ulo si Manny. Gibantayan ni Jerson ang lihok sa tulo ka mga kauban ni Manny.

“Dali ari ta agi sa pikas kay walay daghang nangagi,” matud ni Jerson dungan sa pagguyod sa kamot ni Karlyn. Apan nakabantay si Jerson nga gisinyasan ni Manny ang tulo niya ka bata-bata nga sundon sila si Karlyn. Wala kunohay mosunod si Manny kanila ug didto miagi sa pikas. Gihunghongan ni Jerson si Karlyn nga magbantay kay gisunod sila sa tulo ka lalaki. “Mga bata-bata kana sila ni Manny, mora’g lain og tuyo kanato,” giingnan ni Jerson ang girlfriend. Mihunong sila sa daplin ug gilingi ang tulo.

Tuod, nabantayan ni Jerson nga hait kaayo og tinan-awan kaniya ang tulo. Wala madugay mihana pagsikad kaniya ang usa samtang ang duha gusto nga molipot sa iyang luyo. Napasiyagit si Karlyn sa kakuyaw.

Nakig-away si Jerson sa tulo ka bata-bata ni Manny. Tagsa-tagsa niya nga gipangtumba ang tulo ug nangabot ang duha ka gwardya sa tunghaan. “Kami ang giunahan nila guard. Mga bata-bata kana sila sa akong classmate nga samokan,” giingnan ni Karlyn ang duha ka gwardya.

Didto sa unahan nalantawan pa ni Jerson si Manny nga naglantaw kanila. “Tabangi kining imong mga bata-bata Manny!” gisinggitan ni Jerson ang iyang karibal sa gugma ni Karlyn.

Misamot nga migakus na gayud si Karlyn kang Jerson. “Tana Jerson, ayaw na pangita’g away ni Manny kay nalupig bitaw nimo ang tulo niya ka bata-bata.” Milahos na sila pagpauli samtang mibangon ang tulo ka bata-bata ni Manny nga namapha sa ilang mga abog ug garas sa kalawasan.

“Ngilngig ka man diay moaway Jerson,” gikomedyahan ni Karlyn ang iyang boyfriend dihang didto na sila sa gipuy-an sa dalaga. “Nagsugod na ang atong problema kay sigurado nga mobawos kadtong mga bata-bata ni Manny kanako ug ikaw mahimong pugson na gayud ni Manny aron imo siya nga sugton,” ni Jerson pa.

“Sus wala gayud ko makagusto kaniya Jerson. Kaklase man nako siya last year ug dugay na siya nga nanguyab nako apan wala g’yud ko makagusto niya kay bugoyon,” matud ni Karlyn. “Pwede ba og makigpanuroy ko nimo ugma Karlyn?” giingnan ni Jerson ang girlfriend. -Sumpayan