Maria Magdalena

Gula 80

Si Venus nga akong katabang ray mahibilin sa balay sa higayon nga manglakaw kami ni Camilo. Apan gibaoran nako si Venus nga dili gayod manabi ngadto ni bisan kinsa mahitungod kang Camilo.

Tungod kay ang akong panahon didto na man lang nako gigahin nilang Emilio ug Camilo, wala na ako’y higayon sa pagdumala sa akong tindahan. Si Venus na lang maoy akong gipadumala sa tindahan. Siya nay mangompra sa among mga kinahanglanon. Siya nay tigdawat sa remittance gikan sa drayber nga maoy nagdala sa pagpamasahero sa napalit kong sakyanan nga gipasahero. Gitas-an sab nako ang iyang suweldo.

Nagpadayon ang relasyon namo ni Emilio. Sa samang higayon, nagpadayon usab ang relasyon namo ni Camilo. Nag-amping gyud ko nga dili masayod  si Emilio nga gawas niya, may lain pa kong lalaki nga gikabuangan. Wala koy problema kang Camilo kay nasayod na man siyang daan sa relasyon namo ni Emilio. Misaad si Camilo kanako nga dili siya manghilabot sa relasyon namo ni Emilio basta ipadayon usab namo ang among tinago-tago usab nga relasyon.

Hangtod nga miabot ang higayon nga nakamatikod ko’g kausaban kang Emilio. Kay sa among mga lakaw mohangyo na man siya nga ako ang mobayad. Kun mangaon or kun mo-check in mi sa motel dunay time nga mangayo siya og kuwarta nako. Pero dihang nagsige na lang siya’g pangayo nako’g kuwarta, nakasabot ko nga gusto ko niyang hukhokan. Maong wala na ko mohatag og kuwarta niya. --Sumpayan pa