Lumay sa agta

Taas kaayo ang panglantaw ni Ronnie nga mauyab niya si Meldred. Tungod kay pwerting putia ug gwapa pa gayod. Nangandoy siya nga maangkon ang gugma sa dalaga.

“Meldred nanguyab ba nimo si Cornillio?”, sukot ni Ronnie.

“Ronnie, bisan tuod og karibal mo ni Cornillio wala pa nako siya sugta,” matud ni Meldred.

“Meldred, sugta na lang ko kay dili ka magmahay nako,” ni Ronnie.

“Ronnie., prangkahan lang tika dili ko mosugot nimo kay si Cornillio ang akong pilion,” ni Meldred.

Sa dihang nadungog ni Ronnie ang pahayag sa dalaga nga si Cornillio ang iyang pilion, mora siya og nawad-an sa paglaom.

Nianang pagkagabii takdol ang bulan niadto siya sa punoan sa dakong karaang nangka nga hilabihan ka labong sa mga dahon.

Sa tanto niyang paghinuktok sa gugma. May kalit lang niuyog ang mabagang dahon sa karaang nangka.Napahasiga ang iyang mga mata kay usa man ka agta ang iyang nakita.

“Dooonggg... maluoy man pod ta nimo nga naghinuktok sa gugma. Sige lang kay tabangan ko ikaw, kay nahibalo man ko sa imong problema”, matud pa sa agta nga naluoy kaniya.

“Agta, salamat sa imong pagtabang”. Pero unsaon man nako pagsulbad”?, pahayag ni Ronnie.

“Saaayonnn.... ra kana. Diay usa ka gamay’ng garapa nga may sulod lumay”, matud pa sa agta.

Sa dihang nakuptan na ang lumay nga gihatag sa agta, wala siya musaba ni bisan kinsa ug iya gyod dayong gibalik si Meldred.

“Meldred, sugton na ba ko nimo?”, sukot ni Ronnie.

“Oo, Ronnie, gisugot ko na ikaw”, tubag ni Meldred.

Sa dihang gisugot na si Ronnie. Nagsilbi gyod ang lumay nga hinatag sa agta. Gani kun karibal ang hisgutan wala gyoy dag-an ni Ronnie. Kay pinaagi sa lumay sa agta ang mga dalaga mosugot gyod kini kaniya. Pipila lang gani ka adlaw daghan na kaayo og hinigugma si Ronnie.

Apan nalimot si Ronnie. Kay giabusaran niya ang lumay sa agta daghan siya og gipamabdosan. Gani nanaglinya pa sa ilaha. Ug tungod kay daghan na man usab ang nangabot nga mga babaye kaniya.

Nianang pagka alas 10:00 sa gabii nabantayan ni Ronnie nga nawala ang botelya nga gisudlan sa lumay sa agta. Mao nga iyang giadto pagbalik ang punuan sa karaang nangka.

Apan wala na gyod mopakita niya ang agta. Tungod kay giabusaran niya ang hinatag nga lumay.

Sa dihang niabot ang takna sa alas 12:00 sa gabii. Nitiyabaw si Ronnie sa paghilak tungod kay may hubaghubag nga miturok sa iyang kalawasan ngadto sa iyang hitsura. Nakasabot si Ronnie nga gisilutan siya sa agta.

“Ronnie, gigabaan ka sa mga babaye nga imong gipamabdosan”, pahayag ni Lucricia nga inahan ni Ronnie.

“Mama Lucricia, sangko sa langit ang akong pagbasol. Mao nga gisilotan ako. Pinaagi sa lumay sa agta,” matud ni Ronnie nga nagmahay. (Kataposan)