Hamis kaayo’g paa

Wala gayud mosipyat si Lino kay napasulod gayud niya sa trabaho si Jonalyn sa kompaniya nga gipanag-iya sa iyang uyoan. Wala niya tug-ani si Tiyo Abner niya nga usa ka call girl ang babaye nga iyang gipasulod sa trabaho.

Diha pa masayri ni Lino nga second year college na diay si Jonalyn nga mikuha og kurso nga accounting mao nga gibalhin siya sa Accounting Department gikan sa usa lang unta ka yano nga staff clerk.

“Salamat kaayo sa pagtabang nimo kanako Lin ha? Pasalig nako nimo nga magbinuotan ko sa pagserbisyo dinhi sa kompaniya sa imong uyoan,” matud ni Jonalyn usa ka higayon nga nagkadungan sila pagpaniudto didto sa canteen.

Jonalyn, nahinangop si Lino nga nakatabang siya nga nausab ang kinabuhi ni Jonalyn kay gianugnan siya nga magpadayon kini sa kaanyag niini nga mahimo lang call girl.

Nakabantay si Lino nga wala kaayo ganahi og kaon si Jonalyn ug usahay halayo kaayo kini og linantawan. Mora’g naigo sa kanta ni Anthony Castelo nga “Malayo ang tingin, wala namang tinatanaw.” 

“Nganong mora’g naghinuktok ka man Lyn,” gisukna ni Lino ang dalaga. Mipahiyom og hilaw si Jonalyn. “Abi nimo, birthday man gud nako karon apan wala gani ko magpahibawo kay wala pa may sweldo, wala’y budget.”

“Aw mao ba? Kun mao, happy birthday,” ni Lino pa nga mitunol sa iyang kamot sa dalaga dayong pig-it niini. Nagtinutokay silang duha. Pagka alas tres sa hapon, gipahibalo sa uyoan ni Lino nga dunay break sa trabaho kay mag-snack sila. “Happy birthday Jonalyn,” nakalitan ang dalaga dihang giduol siya sa ilang manager nga uyoan ni Lino. “Tana mo, adto ta sa conference room kay dunay gamay’ng andam alang sa birthday ni Jonalyn,” matud sa manager nga si Abner.

Nakalitan si Jonalyn sa pagsulod niya sa conference room kay duha ka init pa nga litson ang naghapa sa lamesa, mga puso ug uban pa. Gikantahan si Jonalyn sa iyang mga kauban. Daw makahilak si Jonalyn sa kalipay.

Sayud si Jonalyn nga kang Lino kini nga ideya nga hatagan siya og gamay’ng salo-salo uban sa mga kauban niya sa trabaho. Tuod, miabut g’yud si Lino. “Happy birthday Lyn,” ni Lino pa nga mideritso paghawok sa dalaga.

Napasiga ang mga mata sa mga kauban ni Jonalyn dihang migakus kang Lino ang dalaga. Wala kapugngi ni Jonalyn ang paglugmaw sa iyang luha. “Sige na, kaon na Lyn kay nanan-aw kanato,” ni Lino pa.

“Salamat kaayo Lin kay tungod kanimo nausab ang akong pagkatawo,” giingnan ni Jonalyn si Lino. (Kataposan)