Tulo ka gasa sa pasko

Nanimba ang tulo ka managhigalang Merry, Grace ug Cherry sa Misa de Gallo. Nagpasalamat sa Ginoo nga nakagraduwar sa mga kurso nga ilang gikuha. Usab, hatagan unta’g buotang uyab sa Pasko.

Ingon sa gitubag dayon ang ilang gipangayo. Human sa misa, samtang nangaon og budbod pinarisan  og sikwate, may tulo ka ambongang ulitawo ang miduol kanila: si Success, Wealth ug Love. Pulos istoryador ang mga lalaki, busa dali nilang nasuod, nga misangpot sa pagsige nag pamisita niini didto sa bordinghawos nga ilang giestaran.

Usa ka gabii niana, nagsabot ang tulo ka dalaga nga mamili na kinsa sa mga ulitawo ang ilang sugton: si Success, Wealth o si Love ba? “Si Success, brayit, kugihan ug may taas nga ambisyon. Siya ang nagustohan ko.” Matud pa ni Grace.

“Si Wealth, anak og datong negosyante, mahalon kaayo’g sakyanan ang pirmeng dad-on. Financial wise, maharuhay gyod ang pamuyo sa babaye nga maasawa niya. Siya sab ang ako.” Ni Cherry nga nagtingsing miyahat sa duha ka amiga.

“Ay, salamat.” Nakapahiyom si Merry. “Wa gyoy mipili ni Love. Abi ninyo, ganahan kaayo ko ni Love. Simple lang siya manulti, hingatawa, kasarangan man lang ang kahimtang pero lovable!” Ug naminyo gyod sila sa lalaki nga ilang gipili. Triple wedding, nagdungan. Kay nagkasabot nga silang manag-amiga magkita paglabay sa napulo ka tuig human makasal, nag-abot na usab sila sa Redemptorist Church atol sa Misa de Gallo gihapon.

Nakurat si Merry pagkakita niya sa duha ka amiga: “Si Grace nga ang nabana si Success namiyahok ang nawong. Samtang si Cherry nga ang gipili si Wealth, nausab pod ang pigura. Nanambok ang nawong ug wala nay hawak. Naahat pagpangutana si Merry: “Unsa may nahitabo ninyo, uy, nga...”

“Lagi, Mer, malas ko sa paris kong si Success, uy!” Daling sagbat ni Grace. Na’ayyy, tan-awa. Hapit na lang Pasko, pero wa gyod mouli sa Pinas kay gipugngan sa dakong kompaniya sa Amerika nga iyang gidumala. Successful tuod ang iyang propesyon, pero walay panahon sa pamilya.”

“Si Wealth pod, Mer,” salga ni Cherry. “Sige lag atubang sa iyang mga dagkong negosyo. Tagsa ra mouli sa amo. Kay naa man siyay daghang mansiyon. Kada mansiyon ang nagpuyo iyang kabit nga mga starlet dancers ug artista.

Mao nga ang mga lamian na lang nga pagkaon ang pirme kong pamungtan!  Karon nga naghinangat na ang Pasko, di na sab to pakita!”

“Mao ba? Kaalegre god diay sa gidangatan sa inyong life, mga Yads. I’m very sad for that!”

“Ikaw, komosta?” Nagdungan silang Grace ug Cherry pagsumbalik-sukna sa ilang higala, kinsa bisan pa sa naglabay’ng katuigan, ang katahom ingon sa wala lamang gihapon mabun-og sa panahon.

Unya, samtang sila nagkukabildo, may miabot nga lalaki kuyog sa tulo ka mga bata: duhang boys ug usa ka girl. Malipayon ang mga dagway nga daling mibitad sa bukton ni Merry ug nag-ulhos-ulhos sa paghawok: “Good morning, Mommy!”

Nahapatutok ang duha ka amiga ni Merry sa ilang nasaksihan. Labi na dihang mi-kiss sab sa lips ni Merry ang daddy sa mga bata. “Pagka very sweet sa ilang pamilya.” Mao ray nayawit sa mga ngabil nilang Grace ug Cherry. Ilang nabati ang halang sa kasina. Nakomparar man god nila. Ilang bana tungod kay milyonariyo ug sobra ka successful sa trabaho, broken home. Samtang si Love, bana ni Merry, aduna gyoy igong panahon sa iyang pamilya. Dili kay kini lang. Ang latest model nga BMW nga giparking kilid sa simbahan ug ang mga mahalong alahas nga nangumbitay gikan sa liog ngadto sa bukton ni Love, nagtug-an nga naangkon sa panagtiayon nilang Merry ang tiunay’ng kahulogan sa Success, Wealth and Love ning kinabuhi.

“Congrats, Merry. You really got the best gift on Christmas!” Gitunol sa duha ka amiga ang binukhad nilang kamot ngadtong Merry. May mga bugnaw’ng lusok nga nangahulog sa ilang mga mata. (Kataposan)