Mangingilad

“Pagtinarong gyud tawon sa imong trabaho Boyong kay tulo na lang ka tuig moretiro ka na sa serbisyo sa atong munisipyo,” pahimangno ni Melyn sa dayong lakaw sa iyang bana padulong sa trabaho.

“Unsa pa man diay akong buhaton, mao gyud na,” daling tubag ni Boyong.

“Uli baya gyud dayon sa atong balay inig kahuman sa trabaho,” pabawon pa og sulti ni Melyn.

Usa ka empleyado sa munisipyo si Boyong. Taud-taod na siya sa serbisyo. Ulitawo pa gud siya kaniadto dihang nangempleyo siya. Apan bag-ohay pa lang, nagalgal siya sa inom.

Aron may ikasustinir siya sa iyang bisyo, manguwarta siya sa mga tawo nga mudangop kaniya aron magpatabang sa pagpaloap sa ilang mga papeles sa munisipyo. Usa ka higayon niana, may tawo nga miduol niya.

“Sir, pilay bayranan kun molukat ta’g tax certificate sa atong yuta diha sa Assessor’s Office?”, pangutana sa tawo nga taga bukid og pamarog.

“Aw, wa nay problema tagai lang ko og singko mil ako’y trabaho tanan balika lang sunod semana,” pamahayag pa ni Boyong.

Mao ni iyang style pasaligon lang ang tawo apan dili tumanon. Ang nakapait ug nakaparat kay pangayoan dayon niya  og kuwarta alang kunohay sa iyang serbisyo.

Diha pa gyud to’y kausa nga may miduol kaniya nga nagpakitabang kay iyang bana nadakpan sa kapolisan gumikan sa illegal fishing sa ilang lungsod.

“Misis, ayaw og kaguol kay suod nako ang hepe sa polis... kun may dyes mil ka lang areglado na ang tanan. Makagawas dayon ang imong bana sa karsel,” pasalig ni Boyong.

Mitutok og maayo ang babaye niya.

“O sige, andam kong mobayad anang kantidara makagawas lang akong bana.” Mao ni ang stroke kon pamaagi ni Boyong sa pagpanguwarta.

Dangta’g pipila ka buwan, wa gyu’y bisag usa nga natuman sa mga pasalig ni Boyong. Mao tong nakahukom na lang ang iyang mga nabiktima nga mudangop sa Ombudsman aron siya ireklamo. Bug-at ang ebidensiya batok kaniya. Nahukman siya sa pagtonto sa iyang isigkatawo ug sa pagpangilkil og salapi. Nataktak si Boyong sa serbisyo ug perti niyang mahaya. Naigo siya sa panultihon nga ‘kadaghan buhata, kausa ra sakpi!” (Kataposan)