Hamis kaayo’g paa

Giparada ni Lino ang iyang kotse atubangan sa usa ka botika sa Fuente Osmeña kay aron mopalit siya’g tambal. Apan wala dayon siya mosulod sa botika kay nalingaw si Lino pagtan-aw sa mga babaye nga puti kaayo’g paa nga nangagi sa iyang nahimutangan.

Nakabantay si Lino nga basta gabii na gani, pwerteng daghana sa mga babaye nga magsul-ob na lang og short pants nga maglakaw-lakaw sa Fuente Osmeña ug sagad kanila kauban sa ilang mga boyfriend.

Diha’y usa ka babaye nagsul-ob gihapon og short pants ug nagpaingon sa nahimutangan ni Lino. Iya kini nga gitutokan pag-ayo ug takulahaw lang mosakdap ang iyang panan-aw sa hamis kaayo niini nga paa.

Baliwala ra sa babaye nga adunay nagtan-aw kaniya ug gani miikid-ikid pa kini sa paglakaw nga mora’g nagpaibog. Apan wala niya mahibaw-i nga nahulog ang iyang pitaka nga gigunitan uban sa iyang selpon.

Si Lino nga nakabantay niini abtik kaayo nga mitawag sa atensyon sa babaye. Iya kini nga gisitsitan apan ang babaye wala gayud manumbaling kaniya nga nagtoo tingali nga siya gibugal-bugalan.

Gipunit ni Lino ang pitaka sa babaye. Giawhag siya sa usa ka bugoy-bugoy sa maong dapit nga dili iuli ang pitaka apan wala paminawa ni Lino ang bugoy.

Paspas kaayo nga gigukod ni Lino ang babaye nga nagpaingon na sa ganghaan sa dakung hotel sa Fuente Osmeña. Sayon ra niya kini nga nailhan tungod sa iyang gisul-ob.

“Miss excuse me, mora’g nahulog ang imong pitaka no?” gipangutana ni Lino ang babaye. “Hala, o tuod, wala na dinhi sa akong kamot, imong napunitan?” matud sa babaye nga mipahiyom kang Lino.

Mitangdo si Lino. Mipadaplin sila aron dili makabalda sa mga tawo nga nangagi. “Gusto lang nako nga siguroon nga imo gayud kining pitaka Miss,” matud ni Lino.

“Wala na lagi g’yud ang akong pitaka, diri to akong gigunitan uban sa akong selpon,” sa babaye pa. Wala dayon ipakita ni Lino ang pitaka nga gisulod niya sa likud nga bulsa sa iyang karsones.

“May ngalan ba sa maong pitaka? Pilay sulod nga kwarta adto miss,” ni Lino pa aron pagsuta kun ang babaye ba gayud ang tag-iya. Hinoon, nakakita gayud siya nga diha mahulog ang pitaka sa kamot sa babaye.

 â€œWalay ngalan ang pitaka pero ang sulod niadto subra pa sa five hundred,” matud sa babaye nga mitutok ni Lino. Gikuha dayon ni Lino ang pitaka sa luyo nga bulsa sa iyang karsones.

“Aw kana mao na ang akong pitaka!... Jonalyn ang akong ngalan,”   nakapahiyom ang babaye nga nakakita sa pitaka nga gipakita ni Lino.  (Sumpayan)