Milarga gayod si Daniel paingon sa Manila. Nagpadayon pa ang pagtrabaho sa among balay. Gamay na lang ang tiwason sa pagtrabaho. Paglabay sa duha ka semana nakadawat ko’g balita gikan kang Daniel nga naghulat na kaniya ang employer ug kinahanglan nga molarga na siya dayon. Two years ang contract nga nakuha ni Daniel. Magtudlo siya sa mga abnormal nga tawo didto sa London. Human sa duha ka tuig, ayha pa siya mamahimong makapauli sa among dapit. Naghunahuna sa maong gidugayon, nakapangutana ko sa akong kaugalingon kun makaantos ba kaha ko sa kamingaw kang Daniel.
Hingpit na gyud nga nahuman ang among balay. Human sa pagpahigayon sa blessings sa among balay, mibalhin na ko’g puyo didto gikan sa balay sa akong mga ginikanan. Nagsuhol ko’g katabang nga maoy moabag nako sa mga bulohaton sa balay ug aron usab may kauban ko panahon sa kagabhion.
Wala’y puas ang pagkontakay namo ni Daniel pinaagi sa cellphone. Iya kong pahibaloon kun mahimo na nakong kobrahon ang akong allotment gikan sa iyang suweldo. Adto nako withdrawhon sa bangko sa siyudad ang iyang suweldo. Dako-dako gyud ang kantidad ang akong madawat matag bulan, kay Euro man ang suweldo niya.
Gisugdan na nako ang pagpatrabaho sa tindahan nga buyon ra usab sa balay. -- Sumpyan pa