Maria Magdalena

Gula 56

Midali ko pagbangon ug migawas sa kuwarto. Nagpanangpit ko sa akong inahan. Didto maggikan ang iyang tingog sa kosina sa iyang pagtubag. Giadto ko siya. Naabtan ko siya nga naghikay sa among pamahaw.

“Hain man si Brader Daniel, Ma?” Gipangutana ko si Mama Linda.

“Sayo man tong milakaw, moadto seguro siya sa parokya,” maoy tubag. “Mora man to siya’g nagdali. Mibalibad man gani dihang akong gidalitan og kape. Mora’g balisa siya kaayo.”

“Nganong inyo man siyang gitugotan nga molakaw, Ma.”

“K-kay ngano man diay, Maria?”

Gitug-anan ko si Mama Linda sa nahitabo tali namo ni Brader Daniel. Sagol bakak ang akong gisugilon sa akong inahan aron pag-justify nga wala ako’y sala sa nahitabo tali namong duha ni Brader Daniel. Gipatuo nako si Mama nga si Brader Daniel ang misulod sa akong kuwarto ug giangkon niya ang akong pagka-babaye sa pinugos nga paagi.

“Salbahis nga lalaki,” mibuto sa kasuko ang akong inahan. “Wa ko magtuo nga iro diay siya’g kinaiya. Demonyong dako. Nagtuo pa ko nga buotan kay hapit na man kini maordinahan pagka-pari.”

Gisuginlan usab dayon ni Mama si Papa Juan  sa nahitabo. Labihang sukoa sa akong amahan. Daw kumakaon siya’g baga. Dihadiha gitawagan niya ang cellphone ni Brader Daniel. Taudtaod silang nagsultihanay. -- Sumpayan pa