Matinabangon

Gula 5

Gisugat ni Gemma si Lito didto sa ganghaan sa ilang balay. “Maayo kay miabot ka na Lit. Ganina ra nga nagpaabot nimo si daddy. Suod kaayo ka ni daddy uy. Tana, tua si daddy sa lon naghuwat,” matud ni Gemma.

Tuod, nalantawan ni Lito si Mr. Sim nga naglingkod didto sa matahom kaayo nga lon sa ilang panimalay. Mitindog si Mr. Sim ug mipahiyom pagkakita nga nagpaingon sa iyang nahimutangan sila si Gemma ug Lito.

“Maayo kay miabot ka na Lit. Angayan kaayo mo tan-awon si Gemma nga nag-ampad sa paglakaw paingon kanako,” ni Mr. Sim pa nga nagpahiyom. Dunay pipila ka mga Insik nga bisita si Mr. Sim.

Mora’g midaku ang atay ni Lito kay gipaila-ila siya ni Mr. Sim ngadto sa iyang mga bisita ug giingnan nga maoy bayani nga wala masunog ang kotse ni Gemma.

Nahibaw-an ni Lito nga mga tag-iya sa ilado kaayo nga magpapatigayon dinhi sa Sugbo ang mga bisita ni Mr. Sim. Nagpaila usab si Lito nga usa siya ka division chief sa dakung kompaniya nga nagbasi sa Cebu Business Park.

Ingon sa mitingkag ang dunggan sa mga magpapatigayon nga nakadungog. “Uy, naa diay ka magtrabaho sa kompaniya ni Mr. Lu?” matud sa usa ka bisita ni Mr. Sim.

“Moanhi kadto si Mr. Lu karong taud-taud Lit, mas maayo kay irekomendar ko ikaw nga usbawan ka niya og ranggo, kun dili mahimo nga anhi ka motrabaho sa akong kompaniya,” matud ni Mr. Sim.  Gisinyasan ni Mr. Sim sila si Lito ug Gemma nga molingkod uban sa ilang lamesa. “Pre, mora’g pareson man kaayo sila si Lito ug ang imong anak,” gikomedyahan si Mr. Sim sa usa niya ka barkada nga Insik.

“Nakabantay bitaw ko kaganina nga pagpaingon nila dinhi angayan kaayo nga tan-awon. Walay problema nako pre kun magkasabot sila kay kalipay sa akong anak ang akong gilantaw,” matud ni Mr. Sim nga nagpahiyom.

Mora’g nahilis si Lito ug Gemma sa kauwaw ug dungan sila nga miaksyon sa pagduko. “Tinuod ba Gem nga break na kamo sa anak ni Mr. Tiu?” gisukna si Gemma sa usa ka bisita sa iyang amahan.

Igo lang miyango si Gemma ug mipasiklap ni Lito. “Sigi, mangaon na ta,” agda ni Mr. Sim sa iyang mga bisita. “Uy, dia na g’yud, miabot na si Mr. Lu nga boss nimo Lit,” matud ni Mr. Sim. Napasiga ang mga mata ni Mr. Lu pagkakita kang Lito nga uban kini sa iyang mga kumpare nga mga tag-iya og kompaniya ug ingon man dagkung tindahan.

“Bisita nako ang imong staff official Pre,” matud ni Mr. Sim. - Sumpayan