Maria Magdalena - Gula 51

Gitiwas nako ang pagpanghipos sa among nilabhan. Pagkahuman, misulod ko sa balay ug gitabangan si papa Juan nga nagsugod nag hikay sa kusina. Pagkataudtaod nahiabot si mama Linda gikan sa merkado nga nagdala og lab-as nga isdang anduhaw ug bolinaw. Nagtuwa kami alang sa panihapon, ug dunay kinilaw kay mahilig man kuno og kinilaw ang mga taga Bohol.

Sayo kaming nanihapon. Nagdungan mi og pangaon uban ni Brader Daniel.

Human sa panihapon, didto kami sa sala nag-estorya kaming upat ni Mama, Papa ug Brader Daniel. Among gihimamat pag-ayo ang among bisita. Sa sala, giabiabi si Brader Daniel sa akong mga ginikanan. Samtang ako wala kaayo motimbaya tungod kay duna pa may hiposon ug hugasan.

Dihang nahuman ang akong gibuhat sa kusina, mibalik ko sa sala. Mao usay pagbundak sa kusog kaayong ulan. Gisugo dayon ko ni Papa sa pag-andam sa higdaanan ni Brader Daniel. Sa kuwarto sa akong igsuon nga lalaki si Daniel pahigdaon kay wala na may nag-okupar sa maong lawak sukad ang akong igsuon nga lalaki misulod sa seminaryo sa Minglanilla, Cebu. Gituman dayon nako ang mando ni Papa. Gihapinan nako’g bag-ong bed sheet ang higdaanan nga kama. Giilisan sab nako’g bag-ong ponda ang mga unlan ug gibutangan nako’g bag-ong habol.

Migawas ko sa lawak human sa akong gibuhat. Mibalik ko sa sala. Naabtan nako sila si Papa Juan ug Brader Daniel nga nagpadayon sa pagkukabildo. Si Mama Linda mao pa gyu’y pagsulod sa ilang kuwarto ni Papa. -- Sumpayan pa