Gipul-an na

Dear Tita Salie,

Have a good day I am Marice,19 years of age, usa ka dalaga. Naa koy uyab karon, Tita, ug nagpangidaron na siya karon og 33.

Nagproblema gyud ko niining akong uyab. Pero suod na kaayo siya sa akong pamilya. Suod na kaayo siya sa akong mama ug papa. Mao nga gusto na unta ko nga makigbulag niya apan dili ko kasulti ug maikog ko tungod sa iyang ka suod ngadto sa akong pamilya.

Dili na man gud ko ganahan nga ipadayon pa ang among relasyon, Tita Salie, kay wala na may pulos. Unsaon nga perti man gyud ka seloso aning tawhana. Halos kada kita namo, kada pamisita niya sa amo maglalis gyud mi tungod sa selos mao nga mora og gipul-an nako niya.

Ang dako pa gyud nakong problema kay dili siya mosugot nga manarbaho ko. Dili ko niya patrabahoon kay daghan kuno ang tentasyon mahadlok siya nga makakita ko og lain. Pero kinahanglan gyud ko makatrabaho, Tita, kay nagkinahanglan mi og kuwarta aron maoperahan ang tiil sa akong manghod nga nahulog sa hagdanan. Mao gyud kini ang nakahasol nako. Unsa kahay angay nakong buhaton? Palihog pasabta ko. Daghang salamat sa imong pagtagad. God bless you always.

* * *

Dear Marice,

Ayaw pag-antos sa kinabuhi tungod lamang sa kaikog. Maoy gusto sa atong labaw nga makagagahom nga magmalipayon kita niining kinabuhia. Ayaw kalimti nga wala malipay ang Diyos nga nagtan-aw kang Adan nga lonely. Busa iyang gibuhat si Eva to make Adam happy.

Ayaw gyud padaug sa kaikog kay ang imong kaikog mao ra unya kini ang magdala kanimo ngadto sa kinabuhi nga pulos pag-antos. Maoy hunahunaa ang imong kaugmaon ug ang inyong problema sa pamilya. Ug ang presensiya sa imong uyab walay ikatabang sa inyong problema. Hinuon nitabang pa siya paghatag kanimo og problema.

Ang pagkasuod sa imong uyab ngadto sa imong papa ug mama wala’y connection sa inyong relasyon. Lahi ang inyong relasyon ug lahi usab ang ilang pagkahigala. Busa, ayaw kasugot nga mag-antos ka sa inyong relasyon tungod kay suod na siya sa imong papa ug mama.

Bulagi ang imong uyab kun dili siya kasabot sa imong sitwasyon. Selfish ra kaayo siya ug dili siya maayo nga bana. Mas musamot pa unya ang imong problema kun minyo namong duha kay ang tinuod nga nahigugma makamao motan-aw sa imong situwasyon ug kun may ikatabang siya iya gyud kamong tabangan. Tita Salie