Saag nga text message

Giingnan ni Efren si Claire nga dili na lang niya ipatiwas ang pagmasahe kaniya kay gibati na siya’g kalooy sa dalaga.

“Ayaw uy, masahean lang tika pagtiwas Fren kay para makakwarta ko,” matud ni Claire nga mora’g kahilakon nga padayong gigakus ni Efren.

“Ayaw ko og binuangi Fren please, misugot ko nga mouban nimo sa pension house tungod sa panginahanglan og kwarta para sa masakiton nako nga inahan. Nag-ampo ko nga ang lalaki nga akong masahean dili mapahimuslanon,” ni Claire.

Daw nadutlan og tumang kalooy si Efren ngadto kang Claire. Giam-aman niya’g maayo ang dalaga ug gipasaligan nga dili niya kini binuangan. “Salamat kaayo Fren ha nga nakasabot ka kanako,” sa dalaga pa.

“Sige, pag-ilis na Claire kay ubanan ko ikaw sa inyong balay.  Apan mahimo ba nga mo-kiss lang ko kanimo?” mihangyo si Efren sa dalaga nga dayag kaayo ang pagpahiyom.

Samtang gihagkan ni Efren si Claire, iyang nabatyagan nga mikooperar kini ug masabot kaayo nga dili kontra-gusto ang pagpakighagkanay niya kang Efren.

Human sila makailis sa ilang sapot, namiya sila sa pension house. Gigunitan ni Efren ang kamot ni Claire sa tumang kamapinanggaon. Gigiyahan ni Efren si Claire paingon sa duol nga botika. “Asa kadtong palitonon nimo nga tambal?” gisukna ni Efren si Claire. “Wala pa ko’y kwarta Fren nga ikabayad,” giingnan sa dalaga si Efren. “Ako na’y bahala ayaw kabalaka,” matud ni Efren nga midawat sa gitunol nga resita sa dalaga.

Kapin sa usa ka libo ka pesos ang kantidad sa tanan nga diha sa resita. Nabantayan ni Efren nga miginhawa’g lawom si Claire nga nakakita sa gidak-on sa kantidad.

Apan gibayran dayon ni Efren ang tanang tambal. Diha-diha daw kadto maoy nakapadayeg kaayo ni Claire kang Efren. Ang dalaga na ang mibai-id kang Efren ug migunit pa gani sa iyang bukton. “Maikog na kaayo ko nimo Fren,” hagawhaw ni Claire sa ulitawo. Nanglakaw dayon sila ug nanakay’g jeep paingon sa T. Padilla. Dili kaayo daku ang balay nila ni Claire. Misulod sila og didto tuod, sa sala naglingkod ang inahan ni Claire nga maluyahon.

“May kauban ka man lagi Claire,” matud sa inahan. “O Ma, siya si Efren akong amigo, gitabangan ta niya kay siya ang mipalit sa tambal.” Mihilak na usab si Claire ug migakus sa inahan. Natandog na usab si Efren nga nagtan-aw sa mao nga talan-awon. Nasuta gayud ni Efren nga usa ka buotan nga pagka anak si Claire nga dili angay nga binuangan. Gipainum nila’g tambal ang inahan ni Claire ug gipahigda.  “Magpasalamat g’yud kaayo ko nimo Fren,” matud ni Claire nga mitupad paglingkud sa ulitawo.  (Sumpayan)