Saag nga text message

Gula 5

Gihakop sa tumang kalooy si Efren ngadto kang Claire. Naghuna-huna si Efren kun wala ba lang kaha mamakak si Claire aron nga malooy kaniya ang iyang mga customer.

“Nalooy ko nimo Claire. Pwede ba ako nga mouban kanimo adto sa inyong panimalay aron makita nako ang imong inahan?” giingnan ni Efren si Claire aron pagsukod kun wala ba kini mamakak.

Miyango si Claire apan luhaan gihapon ang iyang mga mata. Giam-aman siya ni Efren dungan sa paghapohap sa iyang buko-buko samtang naghigda ang ulitawo.

“Ayaw na kabalaka Claire, sulbaron nato ang imong problema kabahin sa tambal nga gikinahanglan sa imong Mama,” ni Efren pa. Nakahuna-huna pa gayud si Efren og laing paagi pagsukod kun tinuod ba nga nagmasakiton ang inahan ni Claire. “Duna ka ba’y resita sa mga tambal ni Mama nimo?” ni Efren pa.

“Naa sa akong bulsa sa karsones,” mubo nga tubag ni Claire. Nasabot ni Efren nga wala gayud mamakak si Claire. Gibati siya og kalooy sa dalaga.

Nagpadayon si Claire sa pagmasahe kang Efren. Lalim kaayo ang gibati ni Efren sa mga parte sa iyang lawas nga namasahean ni Claire. Sa paniid ni Efren, buotan nga pagka babaye si Claire.

Mitoo si Efren sa gisulti ni Claire nga karon pa siya makasulod og pension house nga momasahe og customer.

“Nahinumdom ka ba nga nangutana ko nimo dihang nag-text pa kita kaniadtong miaging adlaw nga mosugot ka ba kun mohimo ta’g subra pa sa masahe?” gisukna ni Efren si Claire.

Nabantayan ni Efren nga mikurog ang mga kamot ni Claire samtang nagmasahe kaniya. “Fren, pwede og mohangyo ko nimo nga masahe lang unta ang ako,” matud ni Claire.

Mora’g milughaw na usab ang tingog ni Claire nga ingon sa nasabtan ni Efren nga kahilakon ang dalaga. Nagmatuod kini nga dili dautan nga pagka babaye si Claire.

“Ayaw kahadlok kanako Claire, gisukod ko lang ikaw kun mosugot ka ba nga mohimo og extra service. Pwede ba og mo-kiss lang ko nimo Claire,” matud ni Efren.

Wala motingog si Claire. “Nakadayeg ko nimo Claire nga tungod sa daku mo nga pagmahal sa imong inahan, girisgo mo ang imong pagka babaye. Diha ako mihanga kanimo niini. Gusto ko nga ikaw ang mahimo ko’ng kapikas,” dugang ni Efren.

Mihilak si Claire ug napagakus kang Efren. Mapinanggaon nga gigakus ni Efren si Claire ug gipatupad paghigda kaniya. “Ayaw na ko tiwasa’g masahe, malooy ko nimo Claire nga mahago,” gihagkan ni Efren si Claire. - Sumpayan