Langsa og baba

Human na og paniudto sila si Odit, Waning ug Estela sulod sa sikat nga fastfood restaurant sa usa ka dakong mall ning dakbayan. Pero wa pa sila nanggawas. Nagkalingaw sila og tsikatsika. Gipahimudsan nila ang kabugnaw sa aircon sulod sa maong kan-anan. Apan saba kaayo sila. Maninggit. Magkinataw-anay og kusog kaayo.

Manglingi ang daghang mga customer nga sabaan nila. Ang pinakasabaan si Odit kay  morag maoy leader sa grupo. Mga daga pa sila. Ug pihong way mga uyab. Ug ang ilang kasabaan, paagi nila aron pagdani sa pagtagad sa mga lalaki.

Nagkabarkada sila kay kauban sa trabaho. Salesgirls sila sa usa ka botik nga naa ra sulod sa mall. Day off sila karong adlawa. Maong wa sila’y angay’ng dalian. Nagpalabay sila sa oras sulod sa kan-anan nga bugnaw kaayo og aircon.

May ambongang lalaki nga nagdala og tray nga may pagkaon. Gibutang niya ang tray sa bakanteng lamesa tupad sa tulo ka dalaga. Nagkinidhatay sila. Nisamot ilang kasaba. Nisugod na unta og kaon ang lalaki. Niisa sa kutsara sa pagkaon ngadto sa iyang baba. Unya gibutang niya pagbalik ang kutsara sa iyang plato. Nilingi ang lalaki ngadtong Odit nga naglingkod dapit sa wala sa lalaki.

“Miss, human na mo og kaon?” sa lalaki sa malumong tingog. Nitan-aw sa lamesa nila nga hawan.

“O, mister? ni Odit nga nagpatsarming sa iyang sinultihan. Hapit nihikohiko.

“Pero, di pa mo gustong manggawas?” sa lalaki.

“Di pa” ni Odit. Nagtinan-away ang tulo ka dalaga. Nikilo si Odit sa iyang mga kauban nga naglingkod atbang niya.

“Palihug lang. Hinaya inyong mga tingog. Kay di ko mabusog kun may magsaba” sa lalaki.

“Tse!” ni Odit. Nimug-ot ngadto sa lalaki ug dayong lingiw. Nipadayon silas ilang kasaba. Wa gyud kasugod og kaon ang lalaki. Nakapanglingo.

Nitindog ang lalaki. Niduol ni Odit. May gihunghong sa dalaga. Gidul-it sa lalaki iyang baba sa toong dunggan ni Odit. Kalit nangluspad si Odit. Nikalit og tindog. Nisirit og lakaw paggawas. Nisunod ang duha ka barkada nga nangahibulong. “Unsa may gisulti sa lalaki nimo?” ni Waning dihang didto na sila sa gawas. Dugay’ng nakatingog si Odit. Nagpanglingi sa nahimutangan sa lalaki. Unya nipalayo pa gyud. Unsay gihunghong niya?” timang ni Estela.

“Niingon siya nga” nikanga si Odit.

“Unsa?” ni Waning ug Estela. Nagkadungan.

“Kun di ko mabusog sa akong gikaon tungod sa inyong kasaba, isunod ko’g kaon kamong tulo!” ni Odit.

“Unya motoo ka lang dayon?” ni Waning.

“Ambot lang. Pero nahadlok gyud ko. Kay gawas nga isog kaayo iyang mga mata nga way kalimutaw ug nag-usab-usab ang bulok nga moitom ug mopula, langsa kaayo’g baho iyang baba” ni Odit. Nagpanglingi sa iyang luyo bisa’g layo na sila sa kan-anan.

“Mamauli na lang ta” ni Waning. Nangluspad.

“Tama” ni Estela. Nangluspad sab. Lagsik ilang lakang paggawas sa mall. Ug nakahukom si Odit nga di na gyud magsabasaba sulod sa bisan asang kan-anan. (Kataposan)