Saag nga text message

Gula 2

Buot klarohon pag-ayo ni Efren kun kinsa kining babaye nga iyang ikakita unyang hapon. Gi-on pagbalik ni Efren ang iyang laptop aron tan-awon pagbalik si Claire sa iyang Facebook Account.

Sa daghang hulagway ni Claire sa iyang Facebook, nasuta gayud ni Efren nga maanyag ang dalaga. Dili gani makatoo si Efren nga sa panagway ni Claire motanyag kini nga momasahe bisan adto sa pension house.

Misamot ang gibati nga kahinam ni Efren. Gihuna-huna ni Efren kun asa sila nga pension house mosulod aron adto siya magpamasahe. Mora’g na addict na g’yud tinuod si Efren sa masahe.

Pagka alas kwatro sa hapon, nakadawat og text message si Efren gikan ni Claire. Nagpahinumdom kini kang Efren sa ilang panagtagbo ug gani paingon na siya nga molakaw.

“Oki lakaw na ‘sab ko taud-taud,” dali nga gireplayan ni Efren si Claire. Nagdali si Efren pagkaligo ug nag-ilis. Giayo niya’g brush ang iyang ngipon ug mihapit siya’g bubble gum sa tindahan sa aseras.

Nagpaantaw si Efren sa dapit nga adto sila magkita ug si Claire. Gusto ni Efren nga siya ang una nga makakita ni Claire. Tuod, may nalantawan siya nga babaye nga nagbarug ug daw adunay gipaabot.

Gikulbaan si Efren nga naglantaw sa babaye. Gikan sa iyang nahimutangan, klaro kaayo nga iyang nakita nga kun si Claire man ang maong babaye, cute diay kaayo kini nga pagka babaye.

Misamot pagkuba-kuba ang iyang dughan kay miatubang kini kaniya ug nagkatinutokay silang duha. Maanyag gayud tinuod ang maong babaye ug namay-ongan gayud ni Efren nga si Claire ang babaye.

Iya kining gipahiyoman. Anam-anam nga mipaduol si Efren sa babaye. “Ikaw ba si Claire?” ni Efren pa. Miyango ang babaye. “Ikaw ba ‘sab si Efren?”

Nagtinutokay usa sila ug nagsultihanay makadiyot. “Unya asa man ta karon Claire?” gipangutana ni Efren si Claire. “Ikaw gud, uban ra ko nimo kay igo ra man ko nga momasahe,” ni Claire pa.

“Diha lang ta sa luyo sa Metro, dunay pension house diha maayo kay duol ra, malakaw ra,” matud ni Efren. Milakaw si Efren ug misunod kaniya si Claire.

Nanulod sila sa pension house. Halos dili gayud makatoo si Efren nga sa kaanyag ni Claire mouban kini kaniya sulod sa pension house. “Hukasa na ang imong T-shirt Fren ug ang karsones nimo nga maong,” ni Claire pa.

“Nakapanglingo-lingo si Efren nga nagsud-ong ni Claire kay sa iyang pagka cute nagduda siya nga dili kini makapiog sa gidak-on sa iyang lawas.

Nakita ni Efren nga gibuksan ni Claire ang iyang bag ug gipagawas ang iyang panghaplas. - Sumpayan