Laang

Alas dos sa hapon pagsulod  ni Atty. Ben Pungal sa opisina sa gobyerno diin mobayad og multa ang tag-iya sa sakyanan nga naguyod ug na-impound. Gisugat siya’g babaye nga tomboy. Gikuha iyang papel nga dala (pahibalo kun unsay nahitabo sa sakyanan) ug gitudloan siya’s babaye kun asa nga window mobayad sa multa. Nadani iyang pagtagad sa dakong wanang sa lawak sa opisina diin daghang mga lamesa. Ug kadaghanan sa mga lamesa, mga tomboy ang nanaglingkod. “A typical example of  birds of the same feather, flock together” maoy niabot sa iyang hunahuna.

Singko minutos gikan sa pag-parking ni Ben aron kuhaon iyang kapikas nga nigawas sa ospital, naguyod iyang kotse. Nagtaksi na lang sila pagpauli. Kay di siya gustong madugay og huwat iyang misis. Kay basi’g atakehon na sab sa kasingkasing. Ang problema sa iyang kasingkasing ang hinungdan naospital siya’g lima ka adlaw.

Nisunod lang og parking si Ben sa luyo sa nag-parking nga XUB nga abuhon ganihang buntag. Pagbalik niya, nahanaw siyang kotse. Apan ang tungod ras iyang giparkingan ang gibinlan og paskin. Wa na sab ang XUV apan way paskin tungod sa giparkingan.

Sa pagbalik ni Ben sa ospital aron kuhaon ang mga laboratory results, niparking na lang gyud siya’g seguro sa Pay Parking Area. Nitagam siya. Kay P2,500 iyang namulta. May nisenyas nga estambay. Pagkahimutang niya, namatikdan ni Ben nga nagpahiyom ang estambay nga nagtan-aw sa kotse ug sa plate number niini. Naggunit og selpon ang estambay.

Nakaamgo si Ben nga ang XUV nga abuhon, katian sa kompanya nga nagnegosyo og pangguyod. Unya, ang estambay maoy nagteks sa tigguyod nga naa sa say sakyanan nga nasulod sa laang. Bisa’g way traffic sign nga Towing Zone ang naparkingan niya, angay lang kono gihapong guyoron ang kotse kay naay No Stopping. Ang sign layo ra. Lapad ang karsada nga minus og mangaging sakyanan.

Nakahunahuna og buhat og dautan si Ben. Apan tungod sa iyang propesyon ug pamilya, gikalimtan na lang niya iyang dautang laraw. Mag-amping na lang gyud siya sunod nga di masulod sa laang. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag)