Guwatsinanggong bata

Gikan sa eskuylahan, guol kaayo ang hitsura ni Boyet, otso anyos, pag-abot sa ilang balay. Dihang namatikdan ni Marta, iyang inahan, gipangutana: “Nganong mora mag bug-at ang nawong sa anak ko, ha? Gamay na ba  usab og kuha sa eksam?”

Wa motubag si Boyet. Giukban nuon iyang bag ug may gikuha -- usa ka sobre. Gitunol niya kini sa iyang Mama. Human dawata, gibasa ang nasulat sa sobre: ‘To Mr. Nero Tipay. From Mrs. Ester Trika.’ “Uy, gikan man diay ni sa inyong maestra, Dong. Ug gi-address sa imong Papa. Unsa kahay sulod niini?

Ukban na unta ni Marta ang sobre apan gipugngan siya ni Boyet: “Ayaw na ablihi, Ma, uy. Di baya na  imo. Kang Papa baya na!” Paapas-badlong sa anak. Apan gihabwa gyod ni Marta, gihiyad ug gibasa: “Dear Mr. Tipay. Inyong anak, Boyet Tipay, moduha na ka semana nga sige’g palta. Giimbitar ka namo pag-ari sa among principal’s office aron ato ning istoryahan. -- Mrs. Ester Trika.”

Nakugang si Marta sa maong  pahibalo. Kada adlaw man god niyang tagaan si Boyet og hustong bawon nga kuwarta. Unya, wala diay kini sulodsulod sa iyang klase? Kinahanglan tuod nga adtoon gyod niya ang maestra aron masayran ang tinuod nga hinungdan.

Nianang pagka buntag nga andam na si Marta molakaw, gipugngan siya ni Boyet: “Ay...ayaw lag adto, Ma. Si Papa lang, kay siya man ang gisulatan.” Pwerteng nakahawid sa bata. “Ma, ayaw lagiii!!!”

Wa gyod magpapugong si Marta. Sa gipakitang reaksiyon ni Boyet, misamot na hinuon ang iyang kaikag sa pagsusi kun unsay rason nganong na-absent kini’g duha ka semana? Sulod sa principal’s office, nakurat ang principal ug si Mrs. Trika dihang nagpaila si Marta nga siya ang inahan ni Boyet. Gani, iyang namatikdan nga daw nahadlok ang principal ug ang maestra kaniya. Nahibulong siya ngano? “Taym sa, Sir, Ma’am ... nganong mora man mo nakakita’g multo?”

“Kuan man god, Misis...” Sakgaw sa principal nga miigham. “Dihang among giimbestigar imong anak nganong wala siya mosulod og 1 week sa ilang klase, naghilak siyang mitubag.”

“Nganong naghilak man, Sir?” Daling sawo-sukna ni Marta nga mikunot ang agtang.

“Naghilak siya tungod kay matud pa niya, namatay kuno ka ug usa ka semanang gihaya una ilubong. Mao nga mi-absent.

“Mao ba???” Moray nasulti ni Marta nga ingon sa wa makasabot unsay iyang gibati tungod sa gibuhat sa guwatsinanggong Boyet. Human makapanamilit sa principal ug maestra, nagdali si Marta sa pagpauli. “Karon lang gyod kang bataa ka! Karon lang gyod kaaa!!!” Bahad sa gisakitang dughan sa inahan nga gisamaran sa anak. (Kataposan)