Relihiyosong programa sa DYRC kada Domingo

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nakurat ko dihang sa miaging semana gisultian ko ni Assistant Chief Security Officer (ACSO) Ramon Rosal, kauban nako sa trabaho, nga may relihiyosong programa kuno siya sa radyo, AM Station DyRC, kada-Domingo gikan sa alas 4:00 sa kaadlawon hangtod sa ika alas 6:30 sa buntag. Siya ang host ug usa sa iyang mga kaabag mao ang iya mismong anak, si Boyet, kinsa kanhi usa ka seminarista. Wala  ko magtuo, nga sa kapiot sa iskedyul sa among trabahoan, gigahinan gyud niya’g gamay’ng panahon ang atong Ginoo.

Usa ka pagbayloay’g hunahuna bahin sa paghubad sa ebanghelyo nga kinutlo gikan sa bibliya ang kinatibuk-ang unod sa nahisgotang programa, diin ang linya sa telepono abli alang sa tanan nga gustong mopaambit sa ilang kaugalingon nga panahom. Giimbitar ko ni Brod Ramon sa pag-apil ug misulay ko sa pagpabuhagay sa mga pagtulon-an nga maoy akong napupo gikan sa sagradong basahon nga giisip ning tagsulat nga mao ang iwag sa katawhan ning madanglog dalan sa atong kinabuhi.

Hanite si Brod Ramon nga mi-ankor sa maong tulomanon nga tulo na ka tuig diay niyang gitimonan. Kalma, bugnaw ug puno sa kaaghop ang iyang tingog nga nanganaykanay sakay sa kakamig nga giginhawa sa sayong kabuntagon. Makatakod ang kabililhon sa iyang mga pinulongan. Busa, dihang iya kong gitanyagan nga makig-alayon pag-usab sa ilang pundok, di lang ning umaabot Domingo; kun dili, sa tanang Domingo, kinsa ba ang may gahom nga makaako sa pagbalibad?

Naigking ko dihang iyang gisangyaw sa kahanginan nga tigtampohan kuno ko sa Banat News (didto pa nako hibaw-i nga tigbasa sab diay siya sa akong mga sinulat) ug gidasig niya akong mga fans sa pagpaminaw sa akong pagpakigpulong subay sa mga tudling nga giasoy nilang Markus, Mateo, Lukas ug Juan.

“Dili lang ninyo mabasa sa panid sa Banat News si Brod Javier Y. Tapulado; kun dili, mabati na gyud ninyo ang iyang tingog dinhi ning estasyon, DYRC.” Ni Brod Ramon pa nga mihatag nako sa bukas nga linya. Gumikan niini, nadasig ko. Gisuportahan ko ang iyang tumong pinaagi sa pagpasalamat sa estasyonang Radyo Calungsod, DYRC sa paghatag ning maong slot nga libre. Ug hinaot unta, nga suportahan sab kini sa tanang Romano Katoliko nga maabot sa among pagpanguhit!