Pambata si Mengmeng

Sa pag-abot ni Mikay ning hapona gikan sa eskuylahan, gipangita dayon niya si Mengmeng, ang pinangga niyang binuhing gamay’ng iring nga kanunay niyang kugoskugoson ug hagwahagwaon, matag buntag ug hapon sa sulod sa ilang balay. Grade Six na si Mikay sa edad nga 12 ug moggradweyt na siya sa elementerya ning tuiga.

“Shhhh! Swishhhh! Miyawwww! Mengmeng...!” tawag ni Mikay sa gamay’ng iring ug gilili ang tanang suok sa ilang balay, lakip na ang iyang kuwarto ug sa ilawom sa katre. Apan wala gayud niya makita ang gamay’ng iring.

Migawas sa iyang kuwarto si Mikay ug mipadulong sa kusina, diin nagsugod nag digamo sa panihapon ang iyang mama Flora.

“Mama, wa man si Mengmeng sa hawanan ug sa akong kuwarto! Wala ka kakita sa gamay’ng iring, Ma?” sukot ni Mikay sa iyang inahan nga napahunong sa pagluto. Padayong gipaliraw ni Mikay ang iyang mga mata sa palibot sa  ilang kusina.

“Wala ra ba ko kadiparal sa gamay’ng iring, Day Mikay! Pangutan-a si papa nimo nga tua sa natad, basin nakakita siya sa pinangga mong gamay’ng iring...!”

Mikanaog dayon sa natad si Mikay ug giduol ang iyang papa Enteng nga naghapyodhapyod sa iyang hiniktan nga igtatari.

“Wa ka makakita ni Mengmeng, Pa? Wa man siya sa sulod sa atong balay!”

“Tingalig milaag to, day Mikay, dinhi sa atong dapit sa eskuwater ug nangita sa iyang inahan! Basin, mibalik to sa Ayala Business Park diin siya nimo napuniti...!”

Pinunitan ni Mikay ang gamay’ng iring, usa ka kaadlawon nga nahikuyog siya sa iyang papa Enteng nga nag-jogging sa Ayala Business Park. Nag-inusara ang gamay’ng iring nga nagsige og ngiyaw nga daw nabiyaan ug nangita sa inahan diha sa lunhaw’ng kasagbutan sa parke. Puti ug itom ang kolor sa gamay’ng iring.

Sa kaluoy ni Mikay, gipunit niya ang gamay’ng iring ug gidala sa ilang balay sa pagpamauli na nila uban sa iyang papa. Milanat nag tulo ka semana ang pag-estar sa gamay’ng iring sa balay nila ni Mikay nga nahimo niyang pinangga.

Ginganlan kini niya’g Mengmeng. Tungod kay bugtong anak si Mikay sa iyang papa  ug mama Flora, gipasagdan lang siya sa iyang mga ginikanan nga maoy nangunay sa paggalam ug pagpakaon kang Mengmeng matag adlaw.

Gilili ni Mikay ang labong punoan sa bombil sa kilid sa ilang balay. Maoy nasugat sa iyang panan-aw si Mengmeng nga nagtutoy uban sa inahan niyang iring. Natultolan diay si Mengmeng sa iyang inahan!

“Pa! Ma! Dia ra diay si Mengmeng, sa ilawom sa bombil! Nagtutoy sa iyang inahan...!” malipayon nga misinggit si Mikay ngadto sa iyang papa ug mama nga nahalantaw usab kaniya sa may punoan sa bombil niadtong hapona. (Kataposan)