Nakaw na Pag-ibig

Gula 6

Nangaon sila sa canteen. “Mahal ra ba diay kaayo ang baligya dinhi Lorenz kay nakakita ko sa ilang pricing, madak-an ka gayud sa gasto,” matud ni Joy.

Abtik kaayo nga nakakita’g maayong tubag si Lorenz. “Walay kaso kun mahal ang baligya nila dinhi Joy kay ang akong gigastohan mahal man usab sa akong kinabuhi.”

Mipahiyom si Joy nga mitutok ni Lorenz. “Tinuod ba nga mahal g’yud ko nimo Lorenz? Apan unsaon man nato nga daku ka man nga minyo?” Nakasabot si Lorenz nga mora’g may plano na nga mosugot kaniya si Joy.

Apan wala dayon makatubag si Lorenz kun unsay ilang himoon kun sugton siya ni Joy nga aduna man siya’y asawa. “Tubaga ko Lorenz, kun mosugot ko nimo, unsa may atong himoon nga usa ka man ka minyo?”

Nahimo g’yud nga amang si Lorenz, dili man usab niya mahimong bakakan si Joy ug patuohon nga biyaan niya ang iyang asawa. Alang ni Lorenz bisan og wala na sila’y maayong relasyon ug sa iyang asawa apan dili maayo kun iya kining biyaan.

Masub-anon ang panagway ni Lorenz. Mora’g gidaug siya sa iyang pagbati ug maayo na kaayo nga ihilak. “Nalooy ko nimo Lorenz,” gihapuhap ni Joy ang aping ni Lorenz. “Sige, ayaw kaguol Lorenz, bisan og minyo ka, tudloan nako ang akong kaugalingon nga mahalon ka sa hingpit.”

Wala makapugong si Lorenz nga nakapahiyom sa kalipay dihang nadungog niya ang gisulti kaniya ni Joy. “Salamat kaayo Joy. Mag-ampo ko nga tabangan kita sa makagagahum nga masulbad ra kining atong problema sa gugma,” matud ni Lorenz.

Nangaon sila. Dayon misuroy sila palibot sa TOPS ug nagkalingaw pagsud-ong sa kinaubsan sa dakbayan. Dayon nalantawan nila ang daw mga kweba nga didto sa unahan. Mipaingon sila sa maong daw kweba ug nanglingkud.

Mitupad si Lorenz kang Joy. “Wala ka ba mahadlok nga makig-uban nako nga minyo man ko Joy?” matud ni Lorenz dungan sa pag-agbay niya sa dalaga. “Nganong mahadlok man ko nga nasabot man nako nga buotan ka.”

Mingaw kaayo ang palibot. Nahuna-huna ni Lorenz nga layo ra kaayo ang canteen gikan sa ilang nahimutangan ug wala’y laing tawo nga didto sa TOPS. “Unya hain na man kadtong giingon nimo sa una nga dili ko magmahay kun mahimo nimo nga girlfriend,” ni Joy pa nga nagpahiyom.

Nakasabot si Lorenz nga mora’g gihagit siya sa dalaga. Tuod, giparaygan niya dayon ang dalaga ug samtang nagtupad sila sa paglingkud, gigakus niya ang dalaga. Wala gayud makapugong si Lorenz, gipatikan niya’g hawok ang aping ni Joy. - Sumpayan