Nakaw na Pag-ibig

Nangita og bakante nga lamesa si Lorenz nga layo sa ubang customers ug didto siya milingkod. Gilantaw niya ang tindera sa selpon lagbas sa bildo nga bungbong sa fast food store.

Tuod, wala mosipyat ang iyang pagpaabot kay nagdanga-danga na ang tindera. Nakakita dayon kini kaniya nga naglingkod sa daplin nga bahin.

Gitunolan ni Lorenz ang salesgirl og selpon og tibuok usa ka libo ka pesos. “Ikaw na’y pili og unsa’y imong orderon nga pagkaon. Double chicken lang ang ako miss,” giingnan ni Lorenz ang babaye.

Gisundan pagtan-aw ni Lorenz ang babaye nga mipaingon sa counter aron moorder og pagkaon. Bana-bana ni Lorenz nga 18-anyos pa ang pangedaron niini.

Taud-taud, mibalik ang babaye sa lamesa nga gilingkoran ni Lorenz. Milingkod kini atbang sa gilingkoran ni Lorenz. “Mauwaw man ko nimo sir,” matud sa salesgirl.

Nagpaila si Lorenz sa salesgirl. “Joy ang akong ngalan sir,” matud sa babaye. Nagtinutokay sila’ng duha. “Ayaw hatagi og kahulogan ang pag-imbitar nako og pangaon kanimo Joy, nalooy ko nimo kay gigutom ka man kaha,” ni Lorenz pa.

Kadto maoy sinugdanan sa ilang panaghigala. Gikan niadto, kanunay na nga mosuroy si Lorenz sa mall nga nahimutang ang tindahan sa selpon nga gitrabahoan ni Joy.

Nagkasuod gayud sila pag-ayo kay kanunay niya kini nga imbitahon sa pagpangaon. Dunay mga lunch time nga tuyoon gayud ni Lorenz ang pag-adto sa mall aron magdungan sila’g kaon si Joy.

“Ihatud tika sa imong pagpauli unyang gabii Joy,” ni Lorenz pa. Mingisi si Joy nga nakadungog. Igo lang kini nga miyango ang dalaga nga nagpahiyom.

Pagkagabii, mideritso si Lorenz sa mall nga gitrabahoan ni Joy human sa iyang trabaho sa opisina. Naghinam-hinam si Lorenz sa ilang unang deyt sa dalaga.

Nakahukom si Lorenz nga niining ilang panagkuyog, iya na nga panguyaban si Joy. Diha sa huna-huna ni Lorenz ang bayhon ni Joy nga balbon ang bukton  ug tag-as ang natural niini nga kilay.

Mapahiyumon nga pagka babaye si Joy mao man gani nga nadani siya sa pagtan-aw tan-aw sa baligya niini nga selpon ug mao nga nagkahigala sila.

Nagpa-antaw si Lorenz sa pultahan sa tindahan nga gitrabahoan ni Joy. Gitan-aw niya sa iyang relo. Iyang nasayran nga hapit na manirado ang maong tindahan.

Nalantawan na ni Lorenz si Joy nga nagsigi’g pahiyom samtang nakigsulti sa kauban niini nga salesgirl. Gikan sa nahimutangan ni Lorenz iyang nakita ang pagka madanihon sa bayhon ni Joy.

Nakahuna-huna si Lorenz nga dad-on usa niya’g dinner si Joy.  (Sumpayan)