May dalaga na

Dear Tita Salie,

Maayong adlaw, Tita, ug hinaot nga malipayon ka karon sa imong kinabuhi. Tagoa lang ko sa pangalan nga Jella, minyo ug karon usa na ka biyuda, 3 na ka tuig ang milabay. Sa akong kaminyoon nakabaton mi og 3 kabuok mga anak ug ako lang intawon karon ang nagbuhi kanila. Naningkamot na lang gyod ko aron akong mahatag kanila ang akong panginahanglan.

Nagpangidaron pa lang ko karon, Tita og 35 anyos. Tungod lagi kay medyo bata-bata pa man ko nibati pa ko og paghigugma ngadto sa laing lalaki nga medyo may edad na 55 na ang pangidaron karon niini lalaki nga akong gikarelasyon.

Sa iyang pangidaron, Tita, duna na siyay anak nga usa ka daga na. Duna siya mga anak apan dili sila kasal sa inahan niini. Nagpuyo lamang sila sa maong babaye.

Tungod kay duna siyay mga anak gusto na unta ko nga makigbulag kaniya. Apan sa dihang ako na siyang gibulagan iya man hinuon ko nga gigakos pag-ayo ug nagpakiluoy kay dili gyod siya mosugot nga magbulag mi kay love na kuno ko kaayo niya, Tita. Unsa may akong buhaton karon, Tita? Palihog pasabta ko. Daghang salamat sa imong pagtagad.

* * *

Jella maayong adlaw kanimo,

Tinuod nga puyde ka pang mosingit nianang lalakiha tungod kay hangtod karon bisan sa iyang pangidaron, ulitawo lang gihapon siya tungod kay dili pa siya kasado ug gawasnon lang gihapon siya.

Apan hangyoon tikaw nga ayaw hunahunaa ang imong kaugalingon niining maong sitwasyon. Maoy hunahunaa  ang kahimtang ug pamilya sa lalaki nga imong gihigugma karon. Dugay na kaayo silang nag-uban pagpuyo isip pamilya. Infact duna nay dalaga ang ilang anak. Tingali kun wala lang sila’y kwarta nga magasto sa kasal hinungdan nga wala pa gyod sila makasal hangtod karon.

Busa bisan pa man kun magpakiluoy kanang imong boyfriend mas kaloy-i ang iyang pamilya, kaloy-i ang babaye nga iyang gikatipon karon ug ang iyang mga anak, nga mabungkag kun inyong ipadayon ang inyong relasyon. Dili na siya ang lalaki nga alang kanimo tungod kay duna na siya’y dakong obligasyon. Ayaw na padala sa iyang pagpakilooy kay dili kini makaayo sa iyang pagpuyo. Hinuon, tambagi siya nga i-fucos ang iyang attention sa iyang pamilya. Ug ang labing maayo kun imo siyang i-convince nga pakaslan niya ang iyang partner kay I’m pretty sure dako gyod kining kalipay sa babaye nga iyang katipon kay mao kini ang kanunay niyang gihandom.

-- Tita Salie