SUGILANON

Sige, mga papartz order pa mo’g mga ilimnon maayo kay bag-ong sweldo ta karon ‘sky is the limit’,” sulti pa ni Ruben ngadto sa iyang mga barkada nga pulos palainom sad usa ka gabii niana.

May pamilya na siya. Nagniwang na lang ang iyang asawa nga si Ason gumikan sa konsumisyon ug kakulang sa maayong mga pagkaon. Ang ilang anak nga bag-ohay pa lang natawo magpunay lang og hilak gumikan sa kakuwang sa gatas ug bitamina. Gibalewala lamang ni Ruben kining tanan kay gipalabi ang inom ug pang babayeng mugbo og lupad nga kasagaran mahimamat niya sa videokehan ug sa uban pang balay kahilayan.

Basta sweldo gani kaadlawon na siyang mahiuli sa ilang panimalay.

“Abli! Ablihi ang pultahan Ason pagdali!,” singgaak pa ni Ruben nga nagsusapinday sa hilabihang kahubog.

“Hubog na sab ka Ruben?, wala na ra ba tay bugas nga malung-ag ug si Dodong hurot na sab ang iyang gatas,” yawyaw sa iyang asawa samtang nag-abli sa pultahan sa ilang balay sa may squatter’s area.

Tseker si Ruben sa usa ka kompaniya ug may overtime pa apan wala mabadyete ang iyang pamilya kay naglabi man ang iyang bisyo.

“Pang remedyo lang og bugas ug gatas ug ayaw nag yawit diha kay masugamak gyod ka ron sa akong kumo!,” hudlat ni Ruben ngadto sa iyang asawa ug dayong ligid sa lantay nga kawayan.

Miduko na la’g paawot si Ason kay hadlok kaayo siya sa iyang bana kun masuko na kini.

Usa ka gabii niana samtang nag-iring iring si Ruben kang Osang sa usa ka videokehan, dihay usa ka tawo nga nagkawo nga kalit lang miduol kaniya ug dayong dunggab sa iyang tiyan pagkahuman dali kining miikyas. Natumba si Ruben ug mibanaw ang daghang dugo. Dinhi gidali siya’g dala sa ospital.

“Maayo gani kay wala ni siya maintimano sa pagkaigo, luwas na siya misis”, sulti pa sa doctor nga nag-atiman  kang Ruben ngadto kang Ason nga puno sa kaguol ug kabalaka. Pagbuka pa sa mata ni Ruben maoy nakita niya ang iyang asawa nga nagtulo ang mga luha.

“Wala diay moduaw ang mga barkada nako ikaw rang usa Ason? Maayo lang diay ang mga barkada nako sa inom pero bisa’g usa kanila wa gyo’y nakahunahuna sa pagduaw nako dinhi...”, nakapamulong si Ruben nga dalang kahiubos sa iyang mga amigo. (Katapusan)