Gikang mikawas sa Dindo sa iyang gisakyan gikan sa siyudad sa Sugbo, mideretso dayon siya sa usa ka tindahan nga nahimutang diha sa daplin sa karsada aron pagpalit og mga bulak, ug mga kandela.
Bit-bit ang iyang mga pinalit, nagdaling misulod si Dindo sa sam-ang katoliko, aron pagdumdom sa gilubngan ni Mayeth. Ang iyang hinigugma kanhi. Nga namatay tungod kay nabughat man kini, human manganak og usa ka babaye.
Maoy iyang gipuntariya, ang nahimutangan sa dakung krus. Kay nakahinumdom man siya, nga didtong dapita ilubong ang patay nga lawas ni Mayeth. Mao man kini ang gisugilon kaniya sa iyang ig-agaw nga si Andoy. Usa sa mikuyog sa paghatod kang Mayeth dihang gilubong kini. Wala man god makatambong si Dindo, niadtong higayon nga gilubong ang kanhi niyang hinigugma. Kay didto man siya sa Mindanao. Tungod sa iyang trabaho.
Hinuon, wala gyud siyay tuyo si Dindo sa paghatod kang Mayeth ngadto sa katapusang pahulayan niini, kay nagpanagana man sab siya, nga makit-an unya sa amahan ni Mayeth. Dako ra ba gyung supak ang amahan ni Mayeth, sa ilang panaghigugmaay. Gani, nagbahad man ang amahan ni Mayeth, nga patyon gayud niya si Dindo, kun makit-an lang kini. Nasayod man god ang amahan ni Mayeth, nga siya si Dindo mao ang amahan sa gisabak niini.
Misamot ang kahadlok ni Dindo ngadto sa amahan ni Mayeth, kay ang namatyan god niini, mao man ang pagkabughat. Human kini manganak sa ilang liwat ni Dindo. Nga usa ka babaye.
Natingala na lang si Dindo kay wala na may mga lubong diha haduol sa may dakong krus. Sahi sa iyang nasayran gikan sa iyang ig-agaw, nga maoy kanunay’ng motaho kaniya. Wala sab gyud hinuon siya si Dindo, makaduaw sa lubong ni Mayeth. Ilabi na kay layo lagi ang ilang gipuy-an uban sa iyang naasawa. Unsa na lang gani, nakahigayon siya sa pagpauli ning higayona.
Nakahukom na lang si Dindo, nga adto modagkot sa dakung krus. Mao man god kini ang dagkutanan sa uban. Ilabi na niadtong dili na makatultol sa gilubngan sa ilang mga minahal sa kinabuhi. Kay gipanghawanan naman god ang taliwala nga bahin sa sam-ang. Pulos-pulos naman lang gyud mga panteyon ang makita nato sa masigkadaplin niini.
Apan sa pagpaingon na ni Dindo sa nahimutangan sa dakong krus, may naagian siyang usa ka batan-ong babaye nga naghilak atubangan gayud sa usa ka panteyon. Maong napahaurong si Dindo ug nakatan-aw ngadto sa babaye nga naghilak.
Kalit lang napahasiga ang mga mata ni Dindo, sa dihang nabasahan niya ang ngalan sa nahisulat diha sa lapida nga diha sa may baba sa panteyon. Kay ang ngalan man kini ni Mayeth, ang kanhi niyang hinigugma.
Misantop dayon sa kaisipan ni Dindo nga mao na kadto ang lubong ni Mayeth. Tingali og gibalhin lang kini, aron mahapsay ug mahawan gayud ang maong dapit.
Misamot ang pagtuo ni Dindo, nga mao gayud kadto ang nahimutangan ni Mayeth. Kay mikuba man pag-ayo ang iyang dughan nga nagsud-ong sa batan-ong babaye nga nagsige’g hilak. Nakaingon siya sa iyang kaugalingon nga mao tingali kadto ang ilang anak ni Mayeth. Ilabi na nga susama usab kini’g panagway sa kanhi niyang hinigugma.
Ug mao na lang ang namatngunan ni Dindo, nga nag-anam na siya’g duol sa nahimutangan sa batan-ong babaye. Nga maoy nahimutangan sa patay’ng lawas sa iya kanhing hinigugma, nga si Mayeth. (Kataposan)