Giuhaw ako

Mikurog ang pultahan sa bar nga giablihan ni Luziper, ang bagsik ug adik-adik nga anak sa mayor. Gikan pa kini sa motel, diin duha ka guwapang dancer nga iyang gikadulog, wala gyod niya bayri sa kalipay nga gikatugyan nila kaniya. Hinuon, gibun-og pa niya ang mga prosti uban ang pagbahad nga kun moreklamo iya silang pamusilon.

Ug karon, ania na pud siya sa bar aron moinom. Moinom nga walay bayadbayad. Ang kasiga ra sa iyang kabangis maoy gihimong puhunan. Nagsalig lang kay kun dakpon sa mga pulis tungod sa salaod nga iyang nahimo, labanan man sa iyang alkalde nga amahan. Busa, dili ug dili gyod mabilanggo

“Giuhaw ako!” Midahunog ang hait tingog ni Luziper nga mipaingon sa bar counter. Ang bartender nga nakakita, daling mitago. Napuno sa kahadlok. “Beer...Beerrr!!!” Milagubo ang  nawong sa counter nga iyang gipukpok. “I said give me bottles of beer!!!” Mandar niini’g usab. Apan wala  gyo’y waiter nga miduol.

Gipaliraw ni Luziper ang iyang panan-aw sa palibot ug didto kini masangit niadtong lamesa, diin adunay lalaking hamtong nga naggunit sa baso nga puno sa serbesa. Dali niya kining giduol ug giilog ang gipaningot nga baso. Apan hugtanon nga mga kamot nga dili gustong mahiadto sa lain ang maong matang imnonon. “A...Ayaw, ayaw kini sakmita gikan sa akong mga palad. A..ako ra kini ug ayaw angkona! Ayawwww!!!” Puwerting pugong sa hamtong nga dili mahimulag ang baso dihang...

Gilusok sa puan sa pistola ni Luziper ang naghigdang bukton sa lamesa ug nabuhian sa hamtong ang baso nga daling gihakop ni Luziper aron kapugngan ang pagtikba sa sulod niini. May mga basiyong botelya nga natumba, nangaligid ug  nangahulog-tugpa sa salog. Imnon na unta ni Luziper ang tambal sa iyang kauhaw dihang gipugngan siya sa hamtong: “Intawon, ayaw kanag imna! Maluoy ka. Ako...ako kana!!!”

Naglagot si Luziper. Gidul-it ang tumoy sa pistola ngadto sa baba sa hamtong ug milanog ang masipang buto sa kamatayon. Nalup-og sa tiilan ni Luziper ang alaot nga wala nay kinabuhi. “Buang ka, ha? Ikaw ray giuhaw? Ako, diay?” Yawyaw ni Luziper nga mitindak sa lawas palayo sa iyang mga tiil. Ug giyarok niyag hurot ang tanang sulod sa baso nga gigunitan sa wala niyang kamot -- ang nagbulang beer nga maoy tukmang makaalim sa iyang kauhaw.

Apan paglabay sa pila ka mga gutlo, kalit lang usab natumba si Luziper tupad sa hamtong. Mga mata misiga, nagsukdipsudkip samtang ang baba nagbula. Ilawom sa lamesa may putos sa medisina nga may tatak: ‘CYANIDE’. Ug duol sa bolsa sa diyaket nga gisul-ob sa hamtong may milugwang pirasong linikit nga papel.

Gipunit kini sa pulis atubangan sa mga waiter ug daghang tawo, kinsa midugok sa dugoong senariyo niining tungora. Gibukhad sa tinugyanan sa balaod ang papel. Unya gibasa. Ug nahibaw-an nga usa diay kini ka suicidal note gikan sa hamtong, kinsa gibulagan sa iyang batan-ong hinigugma. (Kataposan)