Ang bitin ni Mory

Sayo sa buntag gikuha ni Mory ang iyang sundang sa iyang gibutangan niini, gitaklos kini niya sa sakuban nga gitakin dayon sa iyang hawak aron sa pagpamutol sa mga kahoy’ng igsusugnod para sa pagpangandam sa nagsingabot nga Semana Santa.

Kay mao man gayod ang naandan sa mga katigulangan dinhi sa Baryo Umagos, ang pagpangandam aron inig abot sa Huwebes ug Biyernes Santo dili na mogawas sa ilang tagsa-tagsa ka mga panimalay.

Pamahaw una Dong Mory, aron dili magutman”, agda sa iyang amahan nga si Jeffrey ngadto sa iyang anak.

Human makakaon sa tinughong nga bahaw si Mory, milakaw dayon kini padulong sa kalasangan. Sa paghiabot niya sa dapit wala na siya naglangan nga nagsugod dayon kini sa pagpamutol sa mga kahoy. Apan nakugang si Mory sa iyang nakita usa ka dakung bitin ang nagluko ilawom sa dakung punoan sa kahoy.

Miyanghag ang bitin ug mitan-aw kini kaniya, tungod sa kahadlok ni Mory nakaingon kini “ayaw ko’g paaka ha”. Sa dakung kahibulong daw sa nakasabot ang bitin sa gisulti ni Mory. Gitago pagbalik ang ulo niini nga wala na kini molihok gihinay kini’g kuha ni Mory ug gidala sa ilang Baryo Umagos.

Daw sa nautingkay ang mga tawo sa maong baryo, tungod sa kadako sa bitin nga iyang nadakpan. Apan usa ka adlaw niana mga alas sayis sa sayong kabuntagon, nakurat si Mory sa dihang may misangpit kaniya nga pwerting isuga sa iyang paglili gikan sa gil-ang sa bong-bong sa ilang balay iyang nakita si Jimboy.

“Oh Jimboy unsay problema?” pangutana ni Mory.

“Problema, ikaw ang akong problema kay gihurot og kaon sa imong bitin ang akong mga hiniktan nga manok,” tubag ni Jimboy nga nagpangagot ang mga ngipon niini sa tumang kasuko.

“Wala man makabuhi ang akong bitin, naa ra man kana sa iyahang tangkal”, mabugnaw’ng tubag ni Mory.

“Ah!, dili ka gayod moangkon”, maisugong tingog ni Jimboy.

Mikuha sa kahoy si Jimboy dayog bunal sa tangkal nga gisudlan sa dakung bitin ni Mory. Gibadlong ni Mory si Jimboy ug didto nagkasinumbagay ang duroha. Tungod sa panghitabo nakahukom na lang si Mory nga ibalik na lang niya ang dakung bitin didto sa kalasangan sa dapit diin niya nakuha ang bitin.

Pagkasunod adlaw nagubot na usab ang mga tawo sa Baryo Umagos kay nangawala na sad pag-usab ang ilang mga manok. Nagkasinabot sila nga bantayan nila ang dakung bitin nga maoy tigtukob sa ilang mga manok.

Usa ka gabii niana nakurat ang mga tawo sa ilang nakita, dili man usa ka bitin ang ilang nakit-an, si Burok kana ang ig-agaw ni Jimboy nga may dalang lima ka buok manok hiniktan nga nagkamang-kamang daw sama sa usa ka bitin, aron dili makit-an sa iyang mga silingan. Ug didto nakaingon si Jimboy nga dili diay ang dakung bitin ni Mory ang nakahurot sa iyang mga manok hiniktan ang iya diay’ng ig-agaw nga si Burok ang dakung bitin sa ilang baryo nga miunay kanila. (Katapusan)