Goodbye is not Forever

“Ang gikabalak-an ko karon, Brod Eking,” nakumot ni Albert ang iyang mga buhok samtang namulong, “mao si Josheba. Nagsapaw na ang akong sala ngadto kaniya. Ingon sa wala na akoy nawong nga ikaatubang sa akong hinigugma.” “Apan wala ka pa makaseguro kun aduna ka na ba gyu’y HIV,” ni Eking. “Unya na siya tug-ani kun mamatud-an na nimo kini.”

Nahilom si Albert. Hugot niyang gipamalandongan ang gisugyot ni Eking.

“Dili ko buot mamasin, Brod, namulong si Albert pagkilab sa pipila ka gutling dugtong sa ilang gipanagsultihan. “Siyento porsiyento nga aduna na ako’y virus. “Unsay buot mong ipasabot?” gitutokan si Albert ni Eking.

“Nakamatikod ko nga dunay kausaban ang akong panglawas, Brod,” ni Albert. “Nahunahuna ko, Brod, nga labing maayo nga masayod nang daan si Josheba aron makapangandam na siya sa bisan unsang mga panghitabo sa amo unyang panagkita. Andam ako pagdawat sa bisan unsay iyang ipahamtang kanako.”

“Nan, unsay imong buhaton karon?” gipahunat ni Eking si Albert. “Mag-email ko ni Josheba, Brod,” daling hukom ni Albert. “Pahibaw-on ko siya sa akong kahimtang. Mosibog ako sa among gikasabotan. Dili na mahinayon ang among kasal sa iyang pagpauli.”

“Segurado ka na ba sa mao mong desisyon,” ni Aking.

“Mao na lang kini ang angay kong buhaton niining higayona, Brod,” ni Albert pa. “Wa na koy laing mahimo.” -- Sumpayan pa