Goodbye is not Forever

“Ang buot kong ipasabot, Brod Eking,” ni Albert pa, “nga kun mamatay si Vanessa gumikan sa AIDS, malagmit nga mosunod usab ako.”

U-unsa?” mibangon ang kilay ni Eking.

“Paminaw, Brod,” ni Albert pa nga mipasabot kang Eking. “Dili kay kausa ra kami nahitabo ni Vanessa. Tingali nakakuha na ako’g virus gikan kaniya. Ug sama kang Vanessa, paglabay sa pipila ka tuig magsugod pag-us-os ang kahimtang sa akong lawas hangtod nga mamatay na ako.”

Wala dayon makatingog si Eking. Naghinuktok siya sa gisulti ni Albert. Posible tuod nga natakdan ang iyang higala sa sakit ni Vanessa tungod sa ilang sexual contact.

Tapos sa daklit nga kahilom, si Eking namulong: “Bug-at tuod kining problemaha, Brod. Apan unsay mahimo nakong tabang? Isulti lang.”

“Wa kay ikatabang, Brod, maluyahon ang tingog ni Albert. Dili sayon ang maong problema.”

“Ang gusto ko lang,” namulong si Albert tapos sa pipila ka daklit nga kahilom, “mao nga makaandam ako sa pagdawat niini.”

Nahilom na usab si Eking. Igo lang siya mitutok kang Albert nianang tinan-awan nga nagsipit og kahingawa.

“Nganong nahitabo man kini kanako, Brod. Wala sa iyang kaugalingon nga nakapamulong si Albert. “Tungod kay tawo ka lang, Brod,” matud ni Eking, “adunay kahuyang.”

“Selfish ko, Brod. Hilabihan nakong higugmaa sa akong kaugalingon ug nagpakabuhong sa lawasnong kalipay.”

“Kun mao,” ni Eking pa, “dili pa ulahi ang tanan, Brod. In God and with God everything is possible. Ang ato lang nga mosangpit ta kaniya.” -- Sumpayan pa