Dear Tita Salie,
Maayong adlaw. Tagoa lang ko og Ms. Virgo, 39 years of age, minyo ug dunay anak nga 2 ka buok. Wala na gyod ko kasabot sa among sitwasyon karon ug naglibog ko kun unsay akong buhaton.
Ang akong bana tua sa gawas magtrabaho. Apan akong nasayran nga duna siya’y babaye nga gikalingawan. Japayuki ang maong babaye ug taga Davao. Through celfon ug internet ang ilang communication.
Niuli ang akong bana wala gyod ko niya pahibaw-a. Ang iya diay’ng kabit ang misugat kaniya didto sa airport. Niabot siya sa among panimalay apan wala gyod siya modulog kanako. Nag-away man god mi, nasuko siya tungod kay wala kuno koy natigom. Wala siya masayod nga daghan kaayo ko og problema. Mas importante pa alang kaniya ang kwarta kay sa pamilya.
After two days sa iyang pag-abot milarga siya paingon sa iyang kabit 2 weeks siyang nagpuyo didto, nagdala siya og kwarta bali og 90 mil. Gibaliwala ko lang kini, Tita. Bisan kun ang among mga anak naapektuhan na.
Magsige na lang mi og away kay permi siya init og ulo ipamahid ra ba niya nako ang iyang binuhatan. Naglagot gyod ko pag-ayo kaniya, Tita, tungod kay nangayo pa siya og 15 mil sa iyang papa aron duna siya’y iplete balik og larga. Unsa may akong buhaton, Tita, bulagan ko na lang kaha siya? Palihug pasabta ko. Daghang salamat.
* * *
Maayong adlaw,
Duna gyod moy problema nga angay gyod ninyong lingkoran ug estoryahan. Kulang lang gyod mo sa estorya nga seryoso ug dili init ang ulo. Kulang mo sa sinabtanay mahitungod sa mga butang nga dunay kalabotan ang kwarta ug pamilya.
Una dunay pagpangluod ang imong bana. Nangluod siya kanimo mao nga iyang gihurot ang 90 mil niyang kwarta paggasto. Maoy iyang gusto nga inig uli niya duna unta siya’y makita nga butang ug tinigom nimo isip bugti sa kakapoy ug kamingaw samtang nagtrabaho layo kaninyo.
Natural lamang kini nga iyang pangitaon sa iyang pag-uli. Bisan kinsa naman masuko gyod ug mangluod kun sa ilang kahago wala sila’y nakitang kausaban sa iyang pamilya. Busa nakasabot ko sa imong bana.
Nakasabot usab ako kanimo sa imong pag-asikaso sa imong pamilya ug didto nahurot ang inyong kwarta. Dili lalim ang trabaho ug sitwasyon sa imong bana nga maoy nangita og kwarta. Ang maayo gyod unta nimong buhaton nga duna moy kanunay nga communication aron imo siyang kasultian kanunay kun unsay update sa inyong pamilya labina sa kwarta. Imo siyang balitaan kun imong igasto ang kwarta aron kanunay siyang dunay idea.
Pag-estorya mo ug planohi ang maayo ninyong buhaton aron kalikayan ang problema. Pagpinasayloay mo ug sugdan ang bag-ong estelo. -- Tita Salie