Motingog lang kun ubhon

Ambot unsang pagkaunsaa ... nga sa panahon mag-atubangay na sila si Ponso ug Ulang nga mamisita siya sa maong babaye nga natingban sa iyang pagmahal ... modayon man siya og pangurog hangtud nga dili na makatingog ug maamang?

Tangkod na gud nga tulo ka tuig nga nangulitawo si Ponso kang Ulang, apan wa gayod kini makaamorel. Kanunay matak-om ang iyang baba.

“Sultihi kuno ako Ponso, kun unsa gayu’y bugtong nimong katuyoan kanako?” ni Ulang pa nga wa na gayod makaantos.

Imbis tubagon ni Ponso ang pangutana kaniya ni Ulang, modayon hinuon og piyong ang duha niya ka mata. Alang kang Ulang makalibog hunahunaon.

Dili ikalimod nga ning ilang balangay sa Tinubdan, usa si Ulang nga nakahupot og talagsaong katahom, ilabi na sa kalamurok sa iyang aping. Mapuwa kini kun matandangan sa kainit sa adlaw.

“Ug ingon na lang niini kanunay Ponso, mas maayo pang dili ka na lang magpakita pa kanako?” misamot kapikal ang tuno sa sinultihan ni Ulang. Gipul-an na gayod siya. Imbis unta nga dihay talagsaong pagbati nga nagbakulkol sulod sa iyang dughan ... ngadto kang Ponso ingon na hinuon kini nga nasubhan.

Hapon kadto sa adlaw’ng Sabado. Nag-inusara lang si Ulang sa ilang balay, ilabi na nga niadtong tungora si Nanay niya Porlisanda didto sa simenteryo kay miduaw ni anhing Tatay niya Bartolo. Dili gayod tiaw ang kalaay nga gibati ni Ulang. Daw gigil-asan siya. Wa siya makasabot sa iyang kaugalingon.

Hapit molugwa ang iyang kalimutaw sa dihang mikalit lang og tungha si Ponso sa iyang atubangan, diin kini gihutoy gikan sa sinaguysoy sa way puas niyang ubo.

“Ubooooo ..... uboooo .... ubooooo!” nagdahunog ang sagunson nga ubo ni Ponso.

Ambot unsang pagkaunsaa... may nahunahunaan nga paagi si Ulang. Hinay niyang gihubo ang iyang sanina, lakip na ang iyang underwear.

Milurat og kalit ang duha ka mata ni Ponso, nga nagsud-ong sa kabigot sa lawas ni Ulang. Ingon sa nangalisngaw ang kainit sa iyang kalawasan ug nagkanayon:

“Kiniiii .... anggggg ... gipangitaaaa ... koooo ... Ulangggg .... angggg ..... kahubaggggg ... saaa ... imonggg .... lawasssss!”

Igo lamang mikagik-ik og katawa si Ulang nga nakatingog ra gihapon si Ponso ... bisan dili ubhon!  (Kataposan)