Kaguwapa ni Ma’am - Gula 3

Nagdali si Glenn pag-adto sa dakung tindahan sa dalan Colon nga nahimutangan ni Ma’am Faith.

Naghinam-hinam si Glenn kay wala g’yud siya magtoo nga mosugot si Faith nga makig-uban kaniya sa dinner. Gipaliraw ni Glenn ang iyang mga mata pag-abot niya sa appliances section.

Wala pa malimot si Glenn sa gisul-ob nga teacher’s uniform ni Faith mao nga gipaliraw niya ang iyang mga mata pagpangita sa maanyag nga maestra.

Apan nahaigking na lang si Glenn dihang gituslok ang iyang kilid gikan sa luyo. “Kinsa ang imong gipangita?”

Sanglit gilkanon kaayo si Glenn, nagsagol ang iyang gibati … kakurat ug kagilok.  Apan mipahiyom na lang si Glenn kay nakita man niya nga nagkatawa si Faith kaniya.

“Uy, mao diay nga wala ka dayon nako mailhi kay wala ka na man diay magsul-ob og uniporme,” giingnan ni Glenn si Faith. Igo lang mipahiyom si Faith.

“Asa man ta mag-dinner Glenn?” matud ni Faith. Giingnan si Glenn ni Faith nga usa sa rason nga misugot siya nga mag-dinner sila kay duna siya’y ikonsulta.

Diha ra sila mag-dinner si Glenn ug Faith sa usa ka fast food dapit sa Fuente Osmeña. Sa ilang pag-atubang, diha g’yud nasuta ni Glenn nga gwapa g’yud si Faith.

Nahuna-huna ni Glenn nga imposible kun si Faith walay boyfriend tungod kay sa iyang panagway sigurado nga daghan ang maglumba sa pagpaninguha.

Miabot sa huna-huna ni Glenn nga ang mga kaubang maestro ni Faith sigurado nga nanguyab g’yud kaniya. Gawas sa kaubang maestro, tingali may nanguyab pa nga mga opisyal sa DepEd.

“Uy unsay imong gihinuktokan diha,” naputol ang paghanduraw ni Glenn dihang gitapi ni Faith ang iyang bukton.

“Kuan… nahuna-huna lang nako Ma’am Faith nga kadaghan kaha sa mga lalaki nga nanguyab nimo no kay gwapa ka man,” ni Glenn pa nga mibuhi og hilaw nga pahiyom.

Nakapahiyom usab si Faith sa wala pa siya motubag ni Glenn. “Daghan bitaw nga mi-court nako Glenn apan duna na man gud ko’y boyfriend.”

Mora’g takulahaw lang nga naluya si Glenn nga nakadungog sa gisulti ni Faith nga duna na siya’y boyfriend. “Ikaw Glenn, I’m sure nga duna ka na sa’y girlfriend,” pangutana ni Faith.

Wala motubag si Glenn sa pangutana kaniya ni Faith. Hinoon mihimo siya og laing pangutana sa maestra. “Swerte kaayo ang imong boyfriend no? Hain man siya karon Faith?”

“Nagtrabaho sa barko ang akong boyfriend ug tagdugay kaayo nga mopauli gikan sa iyang biyahe. Mingaw lagi unta apan unsaon man, wala tay mahimz,” ni Faith pa nga mipahiyom. (Sumpayan)