Seryoso na unta si Nico

Canduman, Mandaue City

Usa na ka seaman si Nico. Overseas iyang biyahe. Tinuig una siya makauli sa Pilipinas. Sa bulan sa Pebrero ug Marso iyang bakasyon. Iyang uyab si Soledad nga taga-silingang baryo sa Balagho. Dili siya seryoso sa iyang uyab.

Karong Valentine’s Day, ika-tulo nila ka tuig kay sa tuig 2010 nisugot niya si Soledad. Atol sa Valentine’s Day. Unya kada-Valentine’s Day ra sila magkita. Sa Valentine’s Day 2011 nagsugat sila sa Colon.

Gi-greet lang niya ang dalaga og “Happy Valentine’s”. Igo lang silang nagpahiyumay. Unya nisaylo si Nico nga nag-inusara. Nagpanglingi niya si Soledad nga nagpasabot nga di kontento sa tinagdan sa ulitawo.

Mao gihapon ang nahitabo sa Valentine’s Day 2012. Nagsayloay lang sila sa dalan. Karon, Valentine’s Day 2013, may Valentine’s gift na gyud si Nico alang kang Soledad. Mobisita siya’s dalaga aron sa paghatod sa maong regalo. Ug sukad karong tuiga, seryoso na siya sa ilang relasyon.

Samtang naglakaw si Nico nga postorawo kaayo sa sudlonon nga karsada padulong sa balay sa dalaga, karong sayong kagabhion, nahanduraw niya kun giunsa niya pagpangulitawo ang dalaga. Hapit kada-buntag sila mag-abot sa puso sa barangay Kaloka duol sa utlanan sa duha ka barangay. Tigkaligoan si Nico sa puso sa estudyante pa siya hangtod nga naghulat sa tawag sa iyang giaplayang shipping lines. Si Soledad nga ang angga “Sol” tigpanglaba sa puso. Diha sila nagkaila. Ug diha nagkahigala.

Maanyag si Sol. Madanihon. Hinayon og lihok. Hinayon manulti. Usa ka ehemplo sa usa ka Maria Clara. Mapahiyumon siya kun naa’s duol si Nico. Gaan iyang buot ngadtong Nico. Maong nakahunahuna si Nico sa pagkomedya sa dalaga. Kanunay niyang  komedyahan si Sol sa pag-ingon “Sol.” Molingi si Sol inig kadungog sa iyang angga. Unya sumpayan dayon ni Nico pag-ingon “tihan ko ikaw sa akong gugma.” Mopahiyom lang si Sol kay abig nagkomedya ang ulitawo. Duna may drama sa radyo kaniadto nga nag-ulohan “Sultihan ko ikaw sa akong gugma.”  May pagbati gyud si Nico sa dalaga. Apan gipaagi lang niya’g komedya. Kay kun magseryoso  siya mokurog man sa kakulba.

“Sol, gisultihan na man tika sa akong gugma. Unsa may imong tubag?” ni Nico usa ka higayong sila rang duha sa puso. Valentine’s Day tong adlawa.

“Basig nagkomedya ka, ni Sol. Nagkusokuso sa iyang gilabhan sulod sa palanggana.

“Tininuod ning ako, uy,” ni Nico. Namubo og tubig sa lawas.

“Sige ni Sol.

“Unsay sige?” ni Nico. Nanabon og asol nga sabon.

“Basta gud” ni Sol.

“Uyab nata?” ni Nico.

“O” ni Sol.Tungod adto, nanghambog siya’s mga barkada nga one click niya si Sol.

Pag-abot gyud niya tungod sa hagdan sa balay ni Sol, nagkasugat na sab sila. Nihangad si Nico sa dalaga nga may katupad nga ulitawo sa pagkanaug.

“Happy Valentine’s Nico,” ni Sol nga mapahiyumon ngadto ni Nico.

“Happy Valentine’s  ni Nico. Nagtunol og pinutos nga regalo nga imported nga pahumot ug mahalon.

“Ah, mao diay ni si Nico?” sa lalaki diha sa luyo sa dalaga paghikanaog na nila.

“Ila-ila mo, Nico. Si Dave akong ka-date sa Valentine dinner namo. Dave, si Nico akong Valentino duha ka tuig nang nakalabay,” ni Sol.  Nitudlo ni Dave ug ni Nico. Naglamano ang duha ka ulitawo. Apan wa kalikaye ni Nico ang kahingangha.

“May regalo man ko nimo, Sol?” ni Nico.

“Ihatag na lang na’s lain. Tana, Dave kay daghan na unyang tawo sa atong adtoan,” ni Sol nga nigunit sa walang bukton ni Dave. Nanglakaw sila. Gisundan og tan-aw ni Nico ang mga bukobuko sa duha ka binuhat.

Nahibilin si Nico nga daw giugbok sa iyang gibarogan. Naggunit gihapon sa mabulokong pagkaputos nga kahon sa regalo. Naleksiyon siya. Kay nadawat na ni Sol nga komedya ra gyud ilang relasyon. (Kataposan)