Goodbye is not Forever - Gula 91

Karon ingon sa gihasol gyud og maayo si Albert sa iyang tanlag. Ingon sa maulaw na siyang makig-atubang kang Josheba. Nakasala siya. Dakong sala nga tungod niini, angay na siyang panghimaraoton sa babaye.

Wala lang tuyoa, napiyong ni Albert ang iyang mga mata. Ang kahadlok nga dili pa lamang dugay milabok sa iyang dughan karon nahimo nang multo sa kalisang nga nakapagimok sa iyang kaunoran. Siya ra mismo ang naggahas og dalan aron mosangpot sa kaungkagan ang relasyon nila ni Josheba. Ug kun simbako mahitabo kini, siya ra gyud -- ug wala nay lain pa-- nga mabasol sa tanan.

Unsay iyang buhaton? Likayan ba niya si Vanessa aron dili na masubli ang nahitabo kanila? Dili na buot si Albert nga madugangan pa ang sala nga iyang nabuhat kang Josheba.

Apan kun likayan niya si Vanessa sa ingon kakalit ug kasayon, dili kaha siya tawgon nga traydor ug ingrato sa babaye -- nga molikay na siya human niya pahimusli ang pagka-babaye niini? Human siya niini lipaya? Naglibog si Albert.

Gikuyawan si Albert nga naghunahuna kun masayod si Josheba mahitungod nilang Vanessa. Unsay iyang kalibotan kun adunay hilom nga nagpaniid sa kanunay nilang pagkuyogkuyog ni Vanessa og motaho kini ngadto kang Josheba?

Unya, kalit lang misantop sa iyang hunahuna si James Arado. Husto, si James tuod! Nakaamgo si Albert karon nga kinahanglan nga mag-amping siya sa iyang mga lihok. -- Sumpayan pa