Bagang balhibo

Dear Tita Salie,

Maayong adlaw. Usa ko sa mga tigbasahan sa imong lindog, Tita. Dugay nako nga gustong mangayo kanimo og tambag niining akong problema nga dugay na kaayo nakong gidaladala. Pero kanunay lang ko nga dag-on sa kauwaw mao nga karon pa gyod nako mahimo ang pagpadala niini.

Pasayloa lang ko nga dili nako itug-an ang matuod kong pangalan kay maulaw gyod intawon ko kay tingali kun ila kong mailhan. Busa tagoa lang ko og Ms. M, dalaga pa ko, Tita. Kini akong problema dili kini kabahin sa gugma kun dili bahin kini sa akong ilok nga hilabihan ka baga sa balhibo. Baga gyod kaayo ang balhibo sa ako ilok, Tita, mora gyod ko og lalaki.

Tungod niini dili na lang  hinuon ko makasul-ot og sleeveless nga mga senina kay ulaw man kaayo. Nganong ingon man kini niini ang akong ilok, Tita? Duna kahay tambal nga puyde nakong gamiton aron dili na modaghan ug mobaga ang balhibo sa akong ilok? Kanunay nakong i-shave, Tita, pero grabe paspas pod kaayong motubo.

Unsa may angay nakong buhaton? Palihog tabangi ug pasabta ko kay maulaw na intawon ko. Thank you very much and more power to your page. God bless.

* * *

Maayong adlaw,

Seguro ang inyong kaliwat adunay pagkabalbon o balhiboon ug kusog diha kanimo ang maong dugo. Ug bisan nga babaye ka anaa gihapon ang pagka balbon.

Ang balhibo sa atong lawas, bisan pa man kun imo kining putlon pinaagi sa pagbalbas o shave, mobalik lang gihapon kini pagtubo. Kay ang atong lawas dunay system nga gisunod ug dunay proseso. Ang maong system og process usa ka natural process. Nga samtang duna pay kinabuhi ang tawo padayon usab  kini nga naglihok o nag-operate sa atong lawas.

Busa unsaon nimo og butang og chemicals sa imong lawas motubo gyod gihapon ang mga balhibo samtang buhi pa ta, ug buhi pa ang veins o mga kaugatan niini. Dili nimo kini mapugngan aron dili na motubo. Gawas hinuon kun iya na gyong kabubot-on nga mohunong pagtubo o paggawas sama sa buhok sa ulo sa tawo, nga mokalit lang kini og daw  mamatay na ang mga buhok.

Ang imo lamang mabuhat niini mao ang i-maintain nimo pag-shave ang balhibo sa imong ilok. Imo kining i-shave may be ka-usa matag duha ka-adlaw aron dili gyod siya makataas ug kun permi kang mag-shave puyde kana unyang makasul-ot og mga sexy dress. -- Tita Salie