Gisuwerte si Loreto Gula 4

Gibiyaan sila si Loreto ug Claire sa inahan sa dalaga. Nananghid kini nga mag-andam sa ilang pagkaon.

“Nakaanhi ka g’yud hinoon sa among lungsod Lor, kalayo na ra ba ani sa dakbayan sa Sugbo,” mabalak-on ang tono sa pagkasulti ni Claire. “Sa ako na nga giingon, way problema kay day off nako ugma. Anha na lang ko matulog sa awto para makahatag ko’g ideya nimo sa pag-drive ugma,” ni Loreto.

“Aw, way problema kun anhi ka matulog sa amo kay naa may bakante nga kwarto,” dali nga tubag ni Claire.

Mipahiyom si Loreto.“Mas maayo hinuon aron makasuroy ka ‘sab dinhi sa among lugar ugma ug matudloan ko nimo unsay tukma nga paagi sa pag-drive og sakyanan,” dugang sa dalaga.

Human nila og panihapon, giagni ni Claire si Loreto nga mosuroy sila sa lungsod ug ang sakyanan sa dalaga ang ilang gamiton. Si Claire ang nag-drive ug gisuroy sa dalaga ang iyang bisita sa ginagmay’ng kalingawan sa lungsod.

Dayon nanulod sila og videokehan ug nanganta. Hilig ‘sab diay og kanta-kanta si Claire. Nalingaw kaayo sila sa ilang pagpanganta. Misamot sila kasuod si Loreto ug Claire.

“Dalia ra nato nga nagkasuod uy, ganina pa gani ta’ng buntag nagkakita ug nagkaila karon suod na kaayo ta’ng duha Lor,” ni Claire nga nagpahiyom.

“Ingon ‘sab ako Claire, ingon sa dili makatoo sa paspas kaayo nga pagkilab lang sa mga oras ug gihimo dayon ta niini nga suod nga managhigala. Apan yuna pa, basin og adunay masuko kanako nga nakig-uban nimo Claire,” mabalak-on si Loreto nga miatubang sa dalaga. Giingnan ni Claire si Loreto nga libre pa siya nga makigpanuroy ni bisan kinsa kay wala siya’y boyfriend. “Sa akong pangedaron nga nineteen, wala pa g’yud ko modawat og boyfriend Lor,” matud ni Claire.

Ingon sa dili makatoo si Loreto sa iyang nadungog kay sa panagway ni Claire imposible nga walay daghang lalaki nga nangandoy nga mahimo nila kini nga girlfriend – sama kaniya nga dali ra kaayo nga nabihag sa kaanyag sa dalaga.

Nagpakahilom lang si Loreto ug gitutokan ra niya ang gwapa kaayo nga panagway ni Claire. “Dili ka motoo nga wala pa ko’y boyfriend?” nagngisi si Claire nga misukna ni Loreto.

“Mitoo man. Naghuna-huna lang ko Claire nga kapalaran kaha sa lalaki nga mahimo nimo nga boyfriend no? Sa ato pa mao g’yuy makauna paghawok ug paggakus kanimo,” nagpalabtik na paghinay-hinay si Loreto.

“Mao g’yud, ang pangutana kun si kinsa ang una nako nga mahimong boyfriend,” mipahiyom na ‘sab si Claire ug diha pa maalinggati ni Loreto nga may kandiis diay ang aping sa dalaga. (Sumpayan)