Mingawon if dili kahapit

Dear Tita Salie,

Maayong adlaw. Tagoa lang ko sa ngalan nga Liz, 27 years of age, single mom ko, Tita, kay duna koy live-in partner sa una for five years. Pero nagbulag mi tungod kay magsige ra man mi og away.

Naay nanguyab nako nga lalaki, 23 years old pa siya ug wala pay trabaho. Matud niya nga maningkamot siya nga makatrabaho aron kuno makatabang siya sa pagpa-eskuyla sa akong anak. Busa ako lang siyang giingnan nga balikon lang ko niya kun ugaling duna na siya’y trabaho ug kun ready na siya nga mobuhi kanamo. Pero duna pod koy akoang trabaho, Tita.

Karong bag-ohay lang nagkita mi sa akong classmate sa una nga usa ka tomboy. Dihang nagkaestoryahanay mi pareho diay ming duha nga bag-o lang nagbulag sa among partner. Sukad niadto magsige na siya og hapit nako didto sa akong gitrabahoan. Permi lang mi magkuyog moadto sa disco ug mga gimikan. Unya kausa miingon siya nga kami na lang daw ang mag-uyab karon. Pero wala pa nako siya tubaga, Tita, kay dili pa ko segurado kun love ba gyod ko niya kay bag-o pa man pod siyang nagbulag sa iyang girl.

Mora og na-develop ra ba ko niya, Tita, kay mingawon na man ko niya kun dili siya mohapit nako didto sa akong trabahoan. Mao kini ang nakalibog nako. Palihog pasabta ko kun unsay akong buhaton. Thank you so much and God speed.

* * *

Dear Liz,

Hunahunaa pag-ayo kun unsa gyod ang imong gusto sa kinabuhi. Gusto ra ba nimo nga duna kay kauban o barkada o amiga o gusto nimo ang usa ka bana aron ang inyong pagpuyo matawag gyod  kini nga usa ka  pamilya? Busa sa dili ka pa maghimo og commitment pangutan-a ang imong kaugalingon kun unsay imong gipangita aron dili ka magbalikbalik sa parehong problema. -- Tita Salie