Giswerte si Loreto

Sayo si Loreto nga miadto sa opisina sa Land Transportation Office (LTO) sa dakbayan sa Danao kay gusto siya nga masayo pagkahuman ang iyang transaksyon nga pagbalhin sa ngalan sa tag-iya sa napalit niya nga sakyanan.

Bisan og higala ni Loreto ang hepe sa LTO sa Danao nga si Eddie Mata apan maikog siya nga manghangyo mao nga gusto niya nga subayon ang tukma nga pamaagi.

Wala pa’y alas utso sa buntag didto na si Loreto nagpaabot nga moabli ang opisina. Pipila pa lang ang mga tawo didto. Kaganina ra siya nga nakasigpat sa usa ka gwapa nga babaye nga didto ra sa daplin naglingkod.

Tabian kaayo si Loreto. Sagad mihimo siya’g komedya aron pagwagtang sa kalaay. Nakabantay si Loreto nga nagsigi’g pahiyom kaniya ang gwapa nga babaye apan wala lang motubay sa ilang panag-estorya.

   “Unsa’y imong transaksyon sa LTO miss?” mipaduol si Loreto sa babaye. Iyang nasayran nga molukat diay og driver’s license ang babaye kay unom na ka buwan ang iyang student driver’s permit.

“Dali ra kaayo na miss, paisyuhan dayon nato na ni sir Eddie og plastic ID type license,” giingnan ni Loreto ang babaye ug dayon iyang gituparan sa paglingkod.

Mipahiyom ang babaye. “Amigo diay mo ug ang hepe sa LTO dinhi sa Danao?” gipangutana si Loreto sa babaye. Iyang gitug-anan ang babaye nga maayong tawo si Eddie Mata ug mao nga dali ra sila nga nagkaamigo.

Taud-taud, misulod na sa compound sa LTO ang kotse ni Eddie Mata ug miparking atubangan g’yud sa opisina. “Kanang nanaug mao kana si sir Eddie,” matud ni Loreto dungan sa pagwara-wara sa iyang kamot. “Good morning sir!”

“Dili lagi ko makamao unsay buhaton sa paglukat og lisensya,” matud sa babaye. Gitabangan ni Loreto ang babaye ug gigiyahan asa mokuha og application form.

“Uy, Clarita diay ang imong ngalan?” matud ni Loreto dihang nakita niya nga gisuwat kini sa babaye sa application form. “Claire ang tawag nako sa akong mga higala,” niya pa.

 â€œUy, ikaw unsay imong ngalan kay ganina ra ta nagsultihanay wala g’yud ta magkaila,” matud ni Claire. Mingisi si Loreto ug mipakita sa iyang ID nga gisulod sa iyang bulsa. Loreto Madrid ang imong ngalan?” ni Claire pa nga milingi ni Loreto. Unya migawas si Eddie sa iyang opisina ug gisinyasan si Loreto nga paduolon.

Mibalik si Loreto sa nahimutangan ni Claire. “Mipasalig si sir Eddie nga tabangan ta niya nga madali ang atong traksaksyon kay minus pa man ‘sab ang mga kliyente,” matud ni Loreto. (Sumpayan)