Bidlisiw sa Kabuntagon Gula 7

Sanglit bansay kaayo si Tessie kun unsaon sa pagpagana ang usa ka lalaki mora’g ang bukidnon nga si Magno wala na makasabot sa iyang gibati.

Mora’g nabali ang sitwasyon kay imbis si Magno ang muhimo’g paagi aron mubatyag og kalalim si Tessie, apan ang gwapa na hinuon nga dancer maoy nagpatagamtam kaniya og talagsaon nga pagbati.

“Tess, Tess, mora g’yud ko’g mabuang kun dili ko ikaw maangkon sa hingpit,” wala tuyoa nga nalitok kining maong mga pulong ni Magno tungod sa grabeng kalalim nga iyang gibati. “Sige na Mags, angkona na ko,” paraygong tingog ni Tessie nga nakapadugang sa gibati nga kalalim ni Magno.

Tuod, wala mosipyat si Tessie. Taliwala sa kabugnaw sa panahon sa ilang nahimutangan, giangkon siya ni Magno nga daw usa ka toro nga baka nga bag-o lang nakabuhi gikan sa toril.

Apan wala makalahutay si Magno sa gibati niya nga grabeng kalalim kay gihuman ra dayon niya ang ilang kumbati nga wala gani abti’g dies minutos. Nakapahiyom si Tessie kay nasabtan niya nga wala g’yud intawo’y kasinatian ang iyang kapartner.

“Tess ayaw na lang og pauli didto sa siyudad kay mora’g mabuang tingali ko pananglit mawala ka kanako,” giingnan ni Magno ang gwapa nga dancer sa Wildflower Bar. Nakapahiyom si Tessie sa iyang nadungog.

“Ikaw maoy unang babaye nga nakapukan sa akong pagkalalaki Tess,” nagpahiyom si Magno nga mikawhat sa iyang karsones ug T-shirt. Nag-ilis na ‘sab si Tessie sa iyang sapot. Taud-taud, mitawag na ang duha ka bata-bata ni Magno nga nakapupo na sila og mga prutas.

Gimandoan niya kini sa pagpahatud sa taas sa rest house. “Hala kalami aning presko pa kaayo nga mga butong uy, limbaon pa g’yud nga lubi nga tam-is kaayo’g tubig,” daw nagpanilap si Tessie.

Duna ‘say mga hinog nga mangga ug saging lakatan. “Kun mosugot ka nga ikaw na ang akong asawa Tess, dili kita maglisud sa pagpuyo kay daku kaayo kining akong kaumahan og daghan pa ako og kahayopan,” ni Magno pa.

Nagpahiyom si Tessie kay sa hilom nakagusto usab siya ni Magno nga gawas nga buotan, inosente pa sa mga babaye ug sigurado siya nga ibuhos niini kaniya ang iyang pagmahal. “Unya, imo kaha ko nga panggaon kun mosugot ko nga mahimo nimo nga asawa?” gisukna ni Tessie si Magno. Diha-diha siya nga gipasaligan ni Magno nga panggaon siya niini sa tibuok kinabuhi. Human makapaniudto, gisubli nila ni Magno ug Tessie ang pagparayganay. Wala g’yud tuod mopauli si Tessie sa ilang balay sa Citi-Center sa Barangay Kamagayan.

Pagkaugma. “Nang, biyai na kining inyong payag dinhi sa Citi-Center ug adto na kamo sa Kantipla puyo uban nako,” giingnan ni Magno ang inahan ni Tessie. (Kataposan)