Libelo

Nangluspad ug gipaningot si Kevin paglingkod niya sa lingkuranan dikit sa lamesa ni Atty. Hector Lunok sulod sa bupete sa naulahi. Nagdala si Kevin og subpoena kay nakiha siya’g Libelo. Ipatubag ang maong kaso. Pahimuan og Counter Affidavit. Nakiha siya’g libelo kay isip  usa ka reporter o journalist, nipublikar siya’g usa ka artikulo nga nakapadaut sa dungog sa usa ka boksidor. Gikiha siya’g libelo ni Archie Bunot human napildi sa ikanapulo ka fight. Kay matud pa ni Kevin, nagpapildi og tuyo si Archie. Napalit kuno sa nakapusta sa kontra.

“Naunsa man sab ka nga dili ka man boxing analyst? Unya momantala man lang ka sa imong pangagpas?” ni Hector ngadtong Kevin nga iyang ig-agaw. “Ah bugo na sab kaayo ta kun di kasabot sa iyang drama. Sa tanang nangagi niya nga away, dagko og mas kusgan iyang mga kontra. Wa gyud siya naigo og antimano. Unya karon hinoon nga iyang kontra gamay ug mas guwang kaayo niya, nikalit lang siya’g kabala” pangatarungan ni Kevin. “Unsa may imong ebidensiya nga nagpapildi siya’g tuyo?” ni Hector. Nangunot ang agtang. “Ang CD sa iyang fight. Niingon ang commentator. Archie is doing the opposite of what his coach advised him. Di ba ang usa ka athlete kinahanglan motahod sa coach aron modaug? Kun di ka motahod sa coach, di ka gustong modaug” ni Kevin. “Imo ra sab na” ni Hector.

“Anus-a man nimo himoa akong counter-affidavit, gaw?” ni Kevin. “Balik ugma kay mag-estudyo pa kos balaod. Mag-research pa ko. Kay wa pa god ko ka gunit ining kasoha. Apan sumala sa akong nahinumduman sa law school, kinahanglan ang imong pagmantala dunay malisya. Unya mailhan gyud ang tawong imong gidaut kay ginganlan gyud nimo” ni Hector.

“Sa akong artikulo, wa ko man gyud siya  hinganli. Gihangan gyud tingale kay nagtoo nga siya gyuy gitumong” ni Kevin.  “Nahala. Balik lang ugma. Kay naa pa koy tambungang bista rong buntaga” ni Hector. Gibilin ni Kevin ang subpoena ibabaw sa lamesa sa abogado. Nitindog ug nilakaw. Gisundan og tan-aw ni Hector iyang ig-agaw paggawas sa pultahan. Nagpanglingo ang abogado. Kay may lain na sang kliyente nga libre.

Niukab siya’g SCRA (Supreme Court Reports Annotated) sa ibabaw sa iyang lamesa. Ug nabasa niya ang elemento sa krimen nga libelo. “As defined in Art. 353 of the Revised Penal Code, the crime of libel has the following elements: 1) Imputation of a crime, vice or defect, real or imaginary, or any act, omission, condition, status or circumstance; 2)the imputation must be malicious; 3) it must be given publicity; and 4) the victim must be identified. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag).