Konsumo sa mga tawo

Alas kuwatro i-medya sa kaadlawon. Nangmata na ang managtiayon Dindo ug Edna. Apan wa pa

sila namangon. Nagtupad lang gihapon sila’g higda. Karong adlawa ang ika-30 ka anibersaryo
sa ilang kasal. Bililhon ang maong adlaw alang kanila.

“Manimba ta” sugyot ni Edna.

“Di ko ganahan” ni Dindo.

“Ngano man?”

“Palabihon ko pa nga mag-hike kay sa mosimba”.

“Mas importante nimo ang hike kay sa simba?”

“Sa akong pag-hike mag-ampo ko kanunay. Gipakita nako ang Ginoo nga gusto pa kong mabuhi.”

“Di diay ka magpasalamat nga niabot tag ini ka dugay?”

“Kada gabii ug buntag, magpasalamat ko’s Ginoo.”

“Mao ba?”

“Inig dayong katulog nako matag gabii, magpasalamat ko’s Ginoo nga gihatagan ko niya’g kinabuhi. Inig mata nako sunod buntag, magpasalamat sab ko nga nakamata pa.”

“Mao sab na akong gibuhat.”

“Di, pareha ta. Di na ta angay mosimba.”

“Unsa man gyuy nasupakan nimo anang pagsimba?”

“Kana gong pagsimba, konsumo lang na sa mga tawo.”

Unsay buot nimong ipasabot?”

“Pakita sa mga tawo nga ikaw buotan, tarong, kay nisimba”.

“Sa ato pa, pakaaron-ingnon lang ang pagsimba?”

“Nobenta porsento sa mga tawong nanimba.”

“Hain man ta masakop?”

“Sa diyes porsento”.

“Nganong nakaingon ka ana?”

“Panamini lang atong bugtong anak ug iyang bana”.

“Ngano man diay? Naunsa man sila?”

“Hinimbahon kaayo sila. Dagko kaayo’g hinatagan sa simbahan. Pero sa tawong nagkinahanglan sa ilang panabang, di kahatag.”

“Kinsa may wa nila mahatagi?”

“Kita! Gamay ra kaayo tag sweldo isip empleyado sa gobyerno. Unya, nagsalig lang gihapon sila nato. Puro sila nagtrabaho sa call center. Dagko’g suweldo. Ilang suweldo, ila ra. Nia sila magpuyo sa ato. Wa sila’y gitampo sa gastohan sa atong konsumo. Libre sila tanan. Nia ilang duha ka anak nato. Si Fiona, 5 anyos. Si Lira 2 anyos. Kita ang baby sitter Sabado’g Domingo. Kita’y nagsuweldo sa mga maid niatiman nila. Kita pay makapalit og gatas, diaper ug mga panginahanglan sa mga bata.”

“Mao lagi. Ang ilang suweldo para lang sa ilang pamostora ug  panghindik!”

“Konsumo sa mga tawo”.

“Ilang kuwarta para sab sa ilang load sa selpon ug Facebook para sa mga higala”.

“Konsumo sa mga tawo”.

“Hahay! Pait man diay ni atong kahimtang! Bisa’g relaks relaks na unta ta kay human nag kurso atong anak ug hapit na ta moretiro.”

“Mao nay giingong back subjects.”

“Kay gipangga nato atong mga apo, hilom na lang ta.”

“Om-om na lang ta’s problema.”

“Ayaw na lang nag isipang problema”.

“Unsa man diay na?”

“Tolomanon”.

“Konsumo sa mga tawo.”

Nibangon si Dindo.

“Asa na man ka?” ni Edna.

“Maligo na ko. Aron mag-hike” ni Dindo.

Nibangon na lang sab si Edna. Aron magdigamo sa kusina. Nihawok si Dindo sa ngabil ni Edna. Nag-akob ilang mga ngabil. Dugay.

“Happy Anniversary” ni Dindo sa paghumag hawok.

“Same to you” ni Edna. Nagpahiyomay sila. (Katapusan)